சூப்பர் ஸ்டார் ரஜினிகாந்த் நடித்த 'காலா' படத்தை தயாரித்து சமீபத்தில் வெளியிட்ட அப்படத்தின் தயாரிப்பாளர் தனுஷ், கடந்த சில நாட்களாக அந்த படத்தின் புரமோஷன் பணிகளில் மூழ்கியிருந்தார். இந்த நிலையில் தன்னுடைய படம் ஒன்றின் முக்கிய அறிவிப்பை அவர் வெளியிட்டுள்ளார்.

தனுஷ், நடிப்பில் வெற்றிமாறன் இயக்கத்தில் உருவாகி வரும் 'வடசென்னை' திரைப்படத்தின் முதல் பாக படப்பிடிப்பு முடிவடைந்து அந்த படத்தின் போஸ்ட் புரடொக்சன்ஸ் பணிகள் விறுவிறுப்புடன் நடைபெற்று வருகிறது. இந்த நிலையில் இந்த படத்தின் டிரைலர் ரிலீஸ் தேதியை தனுஷ் தனது சமூக வலைத்தளத்தில் வெளியிட்டுள்ளார். இந்த படத்தின் டிரைலர் வரும் ஜூலை 28ஆம் தேதி வெளியாகவுள்ளது. இதனையடுத்து டிரைலர் ரிலீஸ் தேதியுடன் கூடிய புதிய போஸ்டர்களும் வெளியாகியுள்ளது. மேலும் இந்த படம் வரும் செப்டம்பரில் வெளியாகும் என்றும் தனுஷ் அறிவித்துள்ளார்.

இந்த ஆண்டின் பெரும் எதிர்பார்ப்புக்குரிய படங்களில் ஒன்றான 'வடசென்னை' திரைப்படம் மூன்று பாகங்களாக உருவாகவுள்ளது. இந்த படத்தின் முதல் பாகத்தில் தனுஷ், ஐஸ்வர்யா ராஜேஷ், ஆண்ட்ரியா, சமுத்திரக்கனி, அமீர், டேனியல் பாலாஜி, கிஷோர், உள்பட பலர் நடித்துள்ளனர். சந்தோஷ் நாராயணன் இசையில் வேல்ராஜ் ஒளிப்பதிவில், ஜிபி வெங்கடேஷ் படத்தொகுப்பில் உருவாகி வரும் இந்த படத்தை தனுஷின் வொண்டர்பார் பிலிம்ஸ் நிறுவனம் தயாரித்துள்ளது.