தனுஷ் நடித்த ’வாத்தி’ திரைப்படம் டிசம்பர் 2ஆம் தேதி வெளியாகும் என அதிகாரப்பூர்வமாக அறிவிக்கப்பட்ட நிலையில் தற்போது ரிலீஸ் தேதியில் மாற்றம் ஏற்பட வாய்ப்பிருப்பதாக கூறப்படுகிறது.

தனுஷ் நடித்த ’திருச்சிற்றம்பலம்’ மற்றும் ’நானே வருவேன்’ ஆகிய இரண்டு திரைப்படங்கள் சமீபத்தில் வெளியாகி வெற்றி பெற்றுள்ள நிலையில் டிசம்பர் 2ஆம் தேதி வெளியாகும் ’வாத்தி’ படம் அவருக்கு ஹாட்ரிக் வெற்றி படமாக இருக்கும் என்று எதிர்பார்க்கப்பட்டது.

இந்த நிலையில் ’வாத்தி’ படத்தின் கம்ப்யூட்டர் கிராபிக்ஸ் பணிகள் காலதாமதமாகி வருவதை அடுத்து டிசம்பரில் இருந்து இந்த படத்தின் ரிலீஸ் ஜனவரி தள்ளிப்போக வாய்ப்பிருப்பதாக கூறப்படுகிறது. இது குறித்த அதிகாரப்பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது

ஜனவரியில் பொங்கல் தினத்தில் அஜித்தின் ’துணிவு’ மற்றும் விஜய்யின் ’வாரிசு’ என இரண்டு திரைப்படங்கள் வெளியாக உள்ள நிலையில் ஜனவரி மூன்றாவது வாரம் அல்லது நான்காவது வாரம் ’வாத்தி’ வெளியாகலாம் என்று கூறப்படுகிறது

தனுஷ், சம்யுக்தா மேனன், சாய்குமார், சமுத்திரகனி உள்ளிட்ட பலர் நடித்துள்ள இந்த படத்தை வெங்கி அட்லுரி இயக்கியுள்ளார். தமிழ், தெலுங்கு மொழிகளில் உருவாகி வரும் இந்த படத்திற்கு ஜிவி பிரகாஷ்குமார் இசையமைத்துள்ளார்.