கோலிவுட் திரையுலகின் பிசியான நடிகர், தயாரிப்பாளர், இயக்குனராக வலம் வந்து கொண்டிருக்கும் தனுஷ் நடித்த 'விஐபி 2' திரைப்படம் அடுத்த மாதம் பிரமாண்டமாக வெளியாகவுள்ளது. மேலும் தனுஷ் தற்போது கவுதம் மேனனின் 'எனை நோக்கி பாயும் தோட்டா', 'வடசென்னை மற்றும் ஒரு ஹாலிவுட் படங்களில் நடித்து கொண்டிருக்கின்றார். அதுமட்டுமின்றி சூப்பர் ஸ்டார் ரஜினிகாந்த் நடித்து வரும் 'காலா' படத்தை தயாரித்தும் வருகிறார்.

இந்த நிலையில் சூப்பர் ஹிட் ஆன பாலிவுட் திரைப்படமான 'பர்ஃபி' படத்தை தமிழில் ரீமேக் செய்ய தனுஷ் முடிவு செய்துள்ளதாகவும், இந்த படத்திற்கு 'டூயட்' என்ற டைட்டில் முடிவு செய்யப்பட்டிருப்பதாகவும் செய்திகள் வெளிவந்துள்ளது. ரன்பீர் கபூர், பிரியங்கா சோப்ரா, இலியானா உள்பட பலர் நடித்த இந்த காமெடி மற்றும் ரொமான்ஸ் கலந்த படத்தின் ரீமேக்கில் தனுஷுடன் நடிக்கும் நடிகர்களின் தேர்வு நடைபெற்று வருவதாகவும், மிக விரைவில் இயக்குனர் உள்பட தொழில்நுட்ப கலைஞர்களின் விபரங்களுடன் கூடிய தகவல் வெளிவரும் என்றும் கூறப்படுகிறது.

'பர்ஃபி' படத்தின் அனைத்து அம்சங்களும் தன்னை கவர்ந்துள்ளதாகவும், அது ஒரு சிறந்த படம் என்றும் கூறிய தனுஷ், இந்திய சினிமாவின் மிகச்சிறந்த நடிகர் ரன்பீர்கபுரின் படத்தை ரீமேக் செய்வதில் மகிழ்ச்சி அடைவதாகவும் அவர் மேலும் தெரிவித்துள்ளார்.