தனுஷ் பட தயாரிப்பாளருக்கு வேண்டுகோள் விடுத்து அவரது ரசிகர்கள் ஒட்டியுள்ள போஸ்டர் பெரும் பரபரப்பை ஏற்படுத்தி உள்ளது.

தனுஷ் நடித்து முடித்துள்ள திரைப்படங்களில் ஒன்று ’ஜகமே தந்திரம்’. கார்த்திக் சுப்புராஜ் இயக்கத்தில் உருவாகியுள்ள இந்த திரைப்படம் ஓடிடியில் ரிலீசாக இருப்பதாக தகவல்கள் வெளிவந்து கொண்டிருக்கின்றன. இந்த நிலையில் ’ஜகமே தந்திரம்’ திரைப்படம் திரையரங்குகளில் வெளியாகவே தான் விரும்புவதாக தனுஷும் சமீபத்தில் டுவிட் செய்திருந்தார்.

இந்த நிலையில் ’ஜகமே தந்திரம்’ தயாரிப்பாளருக்கு ரசிகர்கள் கோரிக்கை ஒன்றை விடுத்துள்ளனர். தங்கள் விருப்பத்துக்குரிய நடிகரான தனுஷ் நடிக்கும் ’ஜகமே தந்திரம்’ திரைப்படத்தை திரையரங்குகளில் வெளியிட வேண்டும் என கோரிக்கை விடுத்து நெல்லையில் ரசிகர்கள் ஒட்டிய போஸ்டர்களால் பரபரப்பு ஏற்பட்டுள்ளது.

அந்த போஸ்டரில் ’எங்கள் அன்புத் தலைவர் தனுஷ் அவர்களின் வெற்றி படமான ’ஜகமே தந்திரம்’ திரைப்படத்தை திரையரங்குகளில் வெளியிட்டு அன்புத் தலைவர் தனுஷ் ரசிகர்களுக்கும், திரையரங்க உரிமையாளர்களுக்கும், விநியோகஸ்தர்களுக்கும் மற்றும் திரையரங்குகளை சார்ந்து வாழும் தொழிலாளர்களுக்கும் புத்துயிர் அளிக்குமாறு ஒய்நாட் நிறுவன தயாரிப்பாளரை அன்புடன் கேட்டுக்கொள்கிறோம் என்று ரசிகர்கள் குறிப்பிட்டுள்ளனர்.

ரசிகர்களின் இந்த வேண்டுகோளை ஏற்று ’ஜகமே தந்திர’ம் திரைப்படத்தை திரையரங்குகளில் தயாரிப்பாளர் வெளியிடுவாரா? என்பதை பொறுத்திருந்துதான் பார்க்க வேண்டும்