'காலா' நஷ்டமா? தனுஷ் விளக்கம்
- IndiaGlitz, [Saturday,July 07 2018]
சூப்பர் ஸ்டார் ரஜினிகாந்த நடித்த 'காலா' திரைப்படம் கடந்த மாதம் 7ஆம் தேதி தமிழ், தெலுங்கு மற்றும் இந்தி ஆகிய மொழிகளில் உலகம் முழுவதும் வெளியாகியது. இந்த படம் சென்னை உள்பட தமிழகத்தின் முக்கிய நகரங்களில் நல்ல வசூலை கொடுத்தது. குறிப்பாக சென்னையில் அதிக வசூல் பெற்ற படங்களில் ஐந்தாவது இடத்தை இந்த படம் பெற்றது.
இந்த நிலையில் 'காலா' திரைப்படம் ரூ.40 கோடி நஷ்டத்தை கொடுத்துள்ளதாகவும், இதனையடுத்து விநியோகிஸ்தர்களுக்கு தனுஷ் பணத்தை திருப்பித்தர சம்மதம் தெரிவித்துள்ளதாகவும் முன்னணி ஊடகங்கள் உள்பட பல ஊடகங்களில் செய்தி வெளியானது.
இந்த நிலையில் இந்த படத்தின் தயாரிப்பாளர் தனுஷ் இதுகுறித்து விளக்கம் அளித்துள்ளார். 'காலா' படத்தின் வசூல் குறித்து பொய்யான செய்திகள் ஒருசில ஊடகங்களில் பரவி வருகிறது. உண்மையில் 'காலா' வெற்றிப்படம் மட்டுமின்றி எங்கள் வொண்டர்பார் பிலிம்ஸ் நிறுவனத்திற்கு லாபத்தை தந்து கொண்டிருகின்ற படமாகும். இந்த படத்தை தயாரிக்க எங்களுக்கு வாய்ப்பு கொடுத்த சூப்பர் ஸ்டார் அவர்களுக்கும், இந்த படத்திற்கு பாசிட்டிவ் விமர்சனம் அளித்த பொதுமக்களுக்கும் நன்றி என்று தெரிவித்துள்ளார்.