சமீபத்தில் ரிலீசான 'இது என்ன மாயம்' படத்தில் அறிமுகமான நடிகை கீர்த்தி சுரேஷ், அந்த படம் எதிர்பார்த்த வெற்றியை பெறவில்லை என்றாலும், அவருடைய நடிப்பு சிறப்பாக பேசப்பட்டது. அதேபோல் கீர்த்தி சுரேஷ் நடித்த அடுத்தபடமான 'ரஜினிமுருகன்' பெரும் எதிர்பார்ப்பை ஏற்படுத்தியுள்ளதால் இந்த படத்தின் ரிலீஸுக்கு பின்னர் ஒரு வெற்றி பெற்ற நடிகையாக வலம் வருவார் என எதிர்பார்க்கப்படுகிறது.

இந்நிலையில் 'யாமிருக்க பயமே' பட இயக்குனர் டிகே இயக்கும் ஜீவா நடித்து வரும் 'கவலை வேண்டாம்' படத்தில் இருந்து கீர்த்தி சுரேஷ் திடீரென நீக்கப்பட்டார். இதுகுறித்து இயக்குனர் டிகே கூறியபோது, 'எங்கள் படத்தில் கீர்த்தி சுரேஷ் ஒப்பந்தம் செய்யப்படும்போது 'ரஜினிமுருகன்' படத்தில் மட்டும் நடித்து கொண்டிருந்தார். அவரிடம் நாங்கள் பல்க்காக கால்ஷீட் கேட்டிருந்தோம். அவரும் ஒப்புக்கொண்டு ஒப்பந்தமான நிலையில் திடீரென பிரபுசாலமன் இயக்கும் தனுஷ் படத்திற்கு மொத்தமாக கால்ஷீட் கொடுத்துவிட்டார். எங்களிடம் இதுகுறித்து அவர் கலந்து ஆலோசிக்கவில்லை. ஒருவேளை ஜீவாவை விட தனுஷ் பெட்டர் என அவர் நினைத்துவிட்டாரோ? என்னவோ தெரியவில்லை' என்று கூறி சிரித்தார்.

'இதனால் கீர்த்தி சுரேஷுக்கு பதிலாக நாங்கள் காஜல் அகர்வாலை தேர்வு செய்தோம். நான் கே.வி.ஆனந்த் அவர்களிடம் 'மாற்றான்' படத்தில் உதவியாளராக பணிபுரிந்தபோதே காஜல் அகர்வாலை எனக்கு நன்கு தெரியும். அதை வைத்து அவரிடம் மொத்தமாக கால்ஷீட்டை கேட்டபோது அவர் தயக்கம் ஏதுமின்றி கொடுத்தார். மேலும் இந்த படத்தில் பாபிசிம்ஹாவும் ஒரு முக்கிய கேரக்டரில் நடிக்கவுள்ளார்' என்றும் இயக்குனர் டிகே மேலும் கூறினார்.