தனுஷ், காஜல் அகர்வால் நடிப்பில் இயக்குனர் பாலாஜி மோகன் இயக்கிய 'மாரி' திரைப்படம் நல்ல வரவேற்பை பெற்றதை அடுத்து 'மாரி 2' திரைப்படம் விரைவில் உருவாகவுள்ளது. இந்த படத்திற்கான ஆரம்பகட்ட பணிகள் ஏற்கனவே தொடங்கிவிட்ட நிலையில் இந்த படத்தின் இசையமைப்பாளர் யார்? என்ற கேள்வி தனுஷ் ரசிகர்களிடையே கடந்த சில மாதங்களாக இருந்து வந்தது

'மாரி' படத்தின் வெற்றிக்கு பெரிதும் காரணமான அனிருத், 'மாரி 2' படத்திற்கும் இசையமைக்க வேண்டும் என்று பெருவாரியான ரசிகர்கள் தனுஷூக்கு சமூக வலைத்தளங்கள் மூலம் கோரிக்கை வைத்தனர். இந்த நிலையில் இந்த படத்திற்கு யுவன்ஷங்கர் ராஜா இசையமைக்கவுள்ளதாக அதிகாரபூர்வமாக அறிவிக்கப்பட்டுள்ளது.

பத்து வருடங்களுக்கு பின்னர் தனுஷ் மற்றும் யுவன்ஷங்கர் ராஜா ஆகிய இருவரும் 'மாரி 2' படத்தின் மூலம் மீண்டும் இணைகின்றனர். இதற்கு முன்னர் துள்ளுவதோ இளமை, காதல் கொண்டேன், புதுப்பேட்டை, யாரடி நீ மோகினி, பரட்டை என்ற அழகுசுந்தரம்' போன்ற படங்களில் இணைந்து சூப்பர் ஹிட் வெற்றி கொடுத்த இந்த கூட்டணி, மீண்டும் 'மாரி 2' படத்தின் மூலம் இணணந்தது தனுஷ் ரசிகர்களை உற்சாகப்படுத்தியுள்ளது.