தனுஷ் நடித்து இயக்கி வரும் ’இட்லி கடை’ என்ற படத்தின் படப்பிடிப்பு விறுவிறுப்பாக நடைபெற்று வரும் நிலையில் சற்று முன் தனுஷ் தனது சமூக வலைத்தளத்தில் இந்த படத்தின் ரிலீஸ் தேதியை அதிகாரப்பூர்வமாக அறிவித்தார்.

கடந்த சில மாதங்களுக்கு முன்பு தனுஷ் நடிப்பில் மற்றும் இயக்கத்தில் உருவாகி வரும் ’இட்லி கடை’ படத்தின் படப்பிடிப்பு தொடங்கியது. ஜி.வி. பிரகாஷ் இசையமைக்கும் இந்த படத்தில் நாயகியாக நித்யா மேனன் நடித்து வருகிறார் என்பது ஏற்கனவே அறிவிக்கப்பட்டது. ’திருச்சிற்றம்பலம்’ படத்திற்கு பிறகு மீண்டும் தனுஷ் மற்றும் நித்யா மேனன் ஜோடி இணைவதால், இந்த படம் பெரும் எதிர்பார்ப்பை ஏற்படுத்தியுள்ளது.

அதுமட்டுமல்லாமல், அருண் விஜய் இந்த படத்தில் முக்கிய வேடத்தில் நடிக்கிறார் என்பதும் தகவலாக வெளியானது. தேனி உள்பட சில பகுதிகளில் படப்பிடிப்பு விறுவிறுப்பாக நடைபெற்று வருவதாகவும் கூறப்படுகிறது. முழுக்க முழுக்க ஒரு ரொமான்ஸ் மற்றும் குடும்ப செண்டிமெண்ட் கதை அம்சம் கொண்ட இந்த படத்தை அறிமுக தயாரிப்பாளர் ஆகாஷ் தயாரிக்கிறார்.

இந்த நிலையில் தனுஷ் தனது சமூக வலைதளத்தில் ’இட்லி கடை’ திரைப்படம் ஏப்ரல் 10ம் தேதி தமிழ் புத்தாண்டு விருந்தாக வெளியாகும் என்று அறிவித்துள்ளார். இதற்கான போஸ்டரும் வெளியிடப்பட்டுள்ள நிலையில் அந்த போஸ்டர் இணையத்தில் வைரல் ஆகி வருகிறது.

மேலும் கார்த்திக் சுப்புராஜ் இயக்கத்தில் சூர்யா நடித்த ’சூர்யா 44’ திரைப்படமும் தமிழ் புத்தாண்டு விருந்தாக வெளியாகும் என்று கூறப்படுகிறது. இதனால் தனுஷ் மற்றும் சூர்யா படங்கள் ஒரே நாளில் ரிலீஸ் ஆகுமா என ரசிகர்களுக்குள் எதிர்பார்ப்பை ஏற்படுத்தியுள்ளது.

#idlikadai release announcement pic.twitter.com/iNKNmfridz

— Dhanush (@dhanushkraja) November 8, 2024