தமிழ் பிக்பாஸ் நிகழ்ச்சியில் வேறு புதிய போட்டியாளர்கள் கிடைக்காததால் வீட்டில் இருந்து வெளியேற்றப்பட்டவர்களே மீண்டும் மீண்டும் இடம்பெற்று வருகின்றனர். ஒரு வாரத்திற்கு மட்டும் என்று உள்ளே அனுப்பப்பட்ட ஜூலி, ஆர்த்திக்கு மேலும் கால நீட்டிப்பு வழங்கப்பட்டுள்ளது. அதேபோல் சக்தி நேற்று மீண்டும் பிக்பாஸ் வீட்டிற்குள் நுழைந்துள்ளார்.

இந்த நிலையில் இந்தி பிக்பாஸ் 11வது பாகம் விரைவில் ஒளிபரப்பாகவுள்ளது. இந்த நிகழ்ச்சியில் கலந்து கொள்ளும் நட்சத்திரங்களின் தேர்வு நடைபெற்று வருகிறது. இந்த நிலையில் இந்த நிகழ்ச்சியில் கலந்து கொள்ள பிரபல நடிகை தேவோலீனா பட்டாச்சார்யா மறுத்துவிட்டதாக செய்திகள் வெளிவந்துள்ளது.

பிக்பாஸ் நிகழ்ச்சியை தொகுத்து வழங்கும் சல்மான்கானுடன் தான் நடிக்க விரும்புவதாகவும், அதே நேரத்தில் பிக்பாஸ் நிகழ்ச்சியில் கலந்து கொள்ளும் எண்ணம் தனக்கு இல்லை என்றும் கூறியுள்ளார். இருப்பினும் தன்னை தேர்வு செய்த பிக்பாஸ் நிர்வாகிகளுக்கும் சேனலுக்கும் தனது நன்றி என்றும் அவர் தெரிவித்துள்ளார்.