கடந்த 2016ஆம் ஆண்டு பிரபுதேவா, தமன்னா நடிப்பில் இயக்குனர் விஜய் இயக்கிய 'தேவி' திரைப்படம் நல்ல வெற்றியை பெற்றது. இந்த படத்தில் தேவி, ரூபி என்ற இரண்டு வித்தியாசமான கெட்டப்பில் தமன்னா நடிப்பில் அசத்தியிருப்பார். இதில் ரூபி என்பது பேய் கேரக்டர் என்பது தெரிந்ததே.

இந்த நிலையில் சற்றுமுன் வெளியாகியுள்ள 'தேவி 2' டீசரில் ரூபி மட்டுமின்றி பிரபுதேவாவும் பேய் கேரக்டரில் நடித்துள்ளது போல் தெரிகிறது. இதனை கோவை சரளாவின் வசனமும் உறுதி செய்கிறது.

தேவி முதல் பாகத்தின் பெரும்பாலான காட்சிகள் மும்பையில் படமாக்கப்பட்டிருந்த நிலையில் தேவி 2' இரண்டாம் பாகத்தில் வெளிநாட்டு காட்சிகள் அதிகம் தெரிகிறது. பிரபுதேவாவின் டான்ஸ், தமன்னா, நந்திதாவின் கவர்ச்சியான நடிப்பு, கோவை சரளாவின் காமெடி என இந்த படமும் முதல் பாகம் போலவே த்ரில் மற்றும் காமெடி கலந்த படமாக இருக்கும் என இந்த டீசரில் இருந்து தெரியவருகிறது.

சாம் சி.எஸ் இசை, அயனாங்கே போஸ் ஒளிப்பதிவு, அந்தோணி படத்தொகுப்பு ஆகியவை கச்சிதமாக இருப்பதால் இயக்குனர் விஜய், 'தேவி' படம் போலவே இந்த படத்திலும் வெற்றி பெறுவார் என எதிர்பார்க்கப்படுகிறது.