இளையதளபதி விஜய்யின் 59வது படமும், இசையமைப்பாளர் ஜி.வி.பிரகாஷின் 50வது படமும் ஆன 'தெறி' படத்தின் இசை வெளியீட்டு விழா வரும் 20ஆம் தேதி நடைபெறும் என அதிகாரபூர்வமாக கடந்த சில நாட்களுக்கு முன்னர் அறிவிக்கப்பட்டது. இருப்பினும் இந்த விழா நடைபெறும் இடம் குறித்த தகவல் இதுவரை அறிவிக்கப்படாத நிலையில் தற்போது இதுகுறித்த தகவல் வெளிவந்துள்ளது.

'தெறி' படத்தின் தெறிக்க வைக்கும் இசை வெளியீட்டு விழா சென்னை சத்யம் திரையரங்கில் காலையில் நடைபெறும் என தகவல்கள் வெளிவந்துள்ளது. இந்த விழாவுக்கு கோலிவுட்டின் முக்கிய விஐபிக்கள் வருவார்கள் என்றும் இந்த விழா பிரமாண்டமாக நடைபெறும் என்றும் எதிர்பார்க்கப்படுகிறது. இந்த விழாவில் கலந்துகொள்பவர்கள் குறித்த தகவல் இன்னும் ஒரிரு நாட்களில் வெளிவரும் என தெரிகிறது.


விஜய், சமந்தா, எமிஜாக்சன், பிரபு, ராதிகா சரத்குமார், இயக்குனர் மகேந்திரன், மொட்டை ராஜேந்திரன், மற்றும் விஜய் மகள் திவ்யா, மீனா மகள் நைனிகா உள்பட பலர் நடித்துள்ள இந்த படத்தை கலைப்புலி எஸ்.தாணு பிரமாண்டமாக தயாரித்துள்ளார். அட்லி இயக்கியுள்ள இந்த படம் தமிழ்ப்புத்தாண்டு தினத்தில் வெளியாகும் என எதிர்பார்க்கப்படுகிறது.