దసరా ఒకలా.. సంక్రాంతి మరోలా..
- IndiaGlitz, [Friday,August 11 2017]
తెలుగువారికి ప్రీతిక‌ర‌మైన ప‌ర్వ‌దినాలలో దసరా, సంక్రాంతికి ప్ర‌త్యేక స్థాన‌ముంది. అలాగే సినిమా వారికి కూడా ఈ పండ‌గ‌ల స‌మ‌యం ప్ర‌త్యేకం. వేస‌వి సెల‌వుల తరువాత వ‌సూళ్ల‌కి అనుకూలంగా ఉండేది ఈ పండ‌గ‌ల సెల‌వు రోజుల్లోనే. అందుకే మ‌న‌వాళ్లు ఈ పండ‌గ‌ల‌కి రాబోతున్న విష‌యాన్ని ముందుగానే చెప్పేస్తున్నారు. ఈ ద‌స‌రాకి రెండు పెద్ద సినిమాలు రానుండ‌గా.. రాబోయే సంక్రాంతికి మూడు పెద్ద సినిమాలు వ‌చ్చేందుకు రంగం సిద్ధం చేసుకుంటున్నాయి.
ప్ర‌స్తావించ‌ద‌గ్గ విష‌య‌మేమిటంటే.. ద‌స‌రాకి రానున్న సినిమాలైన స్పైడ‌ర్ (హీరో మ‌హేష్‌బాబు - డైరెక్ట‌ర్ ఎ.ఆర్‌.ముర‌గ‌దాస్‌), జైల‌వ‌కుశ (ఎన్టీఆర్ - బాబీ) చిత్రాలు ఫ్రెష్ కాంబినేష‌న్‌ల‌తో రూపొందితే.. సంక్రాంతికి రానున్న మూడు సినిమాల్లో రెండు సినిమాలు హిట్ కాంబినేష‌న్‌ల‌తో తెర‌కెక్కుతుండ‌డం. జ‌ల్సా, అత్తారింటికి దారేది తరువాత ప‌వ‌న్‌, త్రివిక్ర‌మ్ కాంబినేష‌న్‌లో వ‌స్తున్న చిత్రం.. శ్రీ‌మంతుడు తరువాత మహేష్, కొరటాల శివ కాంబినేష‌న్‌లో రానున్న భ‌ర‌త్ అనే నేను 2018 సంక్రాంతికి సంద‌డి చేయ‌నున్నాయి. అదే సమ‌యంలో బాల‌కృష్ణ, కె.ఎస్‌.ర‌వికుమార్ ల చిత్రం కూడా రానుంది. ఈ ఇద్ద‌రి కాంబోలో ఇది తొలి చిత్రం. మొత్తానికి హీరో, డైరెక్ట‌ర్‌ల కాంబినేష‌న్‌ల విష‌యంలో దసరా కి ఒకలా ఉంటే.. సంక్రాంతికి మరోలా ఉందన్న‌మాట.