இளையதளபதி விஜய் நடித்து முடித்துள்ள 'தெறி' திரைப்படம் வரும் ஏப்ரல் 14ஆம் தேதி ரிலீஸ் ஆவது உறுதி செய்யப்பட்டுள்ள நிலையில் அவருடைய அடுத்த படமான 'விஜய் 60' வரும் 11ஆம் தேதி முதல் தொடங்கப்படும் என கூறப்படுகிறது. விஜய் ஜோடியாக கீர்த்தி சுரேஷ் நடிக்கவுள்ள இந்த படத்தில் பிரபல தெலுங்கு நடிகரும், 'லிங்கா' படத்தின் வில்லனுமான ஜெகபதிபாபு வில்லனாக நடிக்கவுள்ளார்.

இந்நிலையில் இந்த படத்தில் மற்றொரு வில்லன் கேரக்டரில் டேனியல் பாலாஜி நடிக்கவுள்ளதாக செய்திகள் வெளிவந்துள்ளது. ஏற்கனவே கவுதம் மேனன் இயக்கிய காக்க காக்க' 'வேட்டையாடு விளையாடு' உள்பட பல படங்களில் வில்லனாக கலக்கிய டேனியல் பாலாஜி அஜித்தின் 'என்னை அறிந்தால்' படத்திலும் ஒரு சிறு கேரக்டரில் நடித்திருப்பார். தற்போது முதல்முறையாக விஜய் படத்திலும் டேனியல் பாலாஜி நடிக்கவுள்ளார் என்பது குறிப்பிடத்தக்கது.

'அழகிய தமிழ் மகன்' பரதன் இயக்கத்தில் சந்தோஷ் நாராயணன் இசையில் உருவாகவிருக்கும் 'விஜய் 60' படத்தை விஜயா புரடொக்ஷன்ஸ் நிறுவனம் தயாரிக்கவுள்ளது. சுகுமார் மற்றும் ப்ரவீண் கே.எல் ஆகியோர் ஒளிப்பதிவு மற்றும் படத்தொகுப்பு பணியை செய்யவுள்ளனர்.