ഫുട്ബോള്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോ സൌദി അറേബ്യന്‍ ഫുട്ബോള്‍ ക്ലബ്ബായ അല്‍ നസര്‍ വിടാനൊരുങ്ങുന്നതായി സൂചന. മുന്‍ ക്ലബ്ബായ റയല്‍ മാഡ്രിഡിലേക്ക് ക്രിസ്റ്റ്യാനോ മടങ്ങാനൊരുങ്ങുന്നു എന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. റയല്‍ മാഡ്രിഡിലെ സുപ്രധാന ചുമതലയാണ് ക്ലബ്ബ് പ്രസിഡന്‍റെ ഫ്ലോറെന്‍റീനോ പെരസ് ക്രിസ്റ്റ്യാനോയ്ക്ക് വാഗ്ദാനം ചെയ്തിരിക്കുന്നത് എന്നാണ് സൂചന. പുതിയ ക്ലബ്ബുമായി പൊരുത്തപ്പെടാന്‍ വരുന്ന കാലതാമസവും ക്ലബ്ബിന്‍റെ മത്സരങ്ങളിലെ മോശം പ്രകടനവുമാണ് താരത്തെ ഈ തീരുമാനത്തിലേക്ക് എത്തിച്ചിരിക്കുന്നത് എന്നാണ് അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. റിയാദ് അടിസ്ഥാനമായുള്ള അല്‍ നസര്‍ ക്ലബ്ബില്‍ ചേര്‍ന്നതിന് പിന്നാലെ 14 മത്സരങ്ങളില്‍ നിന്നായി 11 ഗോളുകളാണ് ക്രിസ്റ്റ്യാനോ നേടിയത്. മാഞ്ചെസ്റ്റര്‍ യുണൈറ്റഡിലെ മാനേജര്‍ എറിക് ടെന്‍ ഹാഗുമായി തുടര്‍ച്ചയായി ഉണ്ടായ ഉരസലുകള്‍ക്ക് പിന്നാലെ ജനുവരിയിലാണ് ക്രിസ്റ്റ്യാനോ അല്‍ നസറിലെത്തിയത്.