பிரபல நடிகை பாவனா சமீபத்தில் கடத்தப்பட்டு பலாத்காரம் செய்ய முயன்ற சம்பவத்தின் விசாரணை தற்போது உச்சக்கட்டத்தை அடைந்துள்ளது. ஏற்கனவே இந்த சம்பவத்திற்கு காரணமானவர்கள் என்று கூறப்படும் நான்கு பேர் கைது செய்யப்பட்டு அவர்கள் மீது வழக்குப்பதிவு செய்யப்பட்டுள்ளது.

மேலும் இந்த கடத்தலில் பிரபல நடிகர் உள்பட பல முக்கிய புள்ளிகள் சம்பந்தப்பட்டிருக்கலாம் என்றும், லட்சக்கணக்கான பணம் இந்த சம்பவத்தின் பின்னணியில் இருப்பதாகவும் கூறப்படுகிறது.

இந்நிலையில் பிரபல நடிகர் திலீப் தனது மனைவி மஞ்சுவாரியரை பிரிய பாவனாதான் காரணம் என்றும், அதற்கு பழிவாங்கவே திலீப் பின்னணியில் இந்த கடத்தல் நடந்ததாகவும் கூறப்பட்டு வந்தது.

ஆனால் இந்த தகவலை நடிகர் திலீப் மறுத்துள்ளார். பாவனா கடத்தலுக்கும் தனக்கும் எந்த சம்பந்தமும் இல்லை என்றும், இந்த சம்பவம் தன்னை மிகவும் பாதித்துள்ளதாகவும், குற்றவாளிகள் மீது கடும் நடவடிக்கை எடுக்க வேண்டும் என்றும் அவர் கூறியுள்ளார்.

ஒவ்வொரு நாளும் திடுக்கிடும் திருப்பங்கள் இந்த வழக்கில் ஏற்பட்டு வருவதால் விரைவில் இந்த சம்பவத்திற்கு மூளையாக செயல்பட்டவர் பிடிபடுவார் என்று எதிர்பார்க்கப்படுகிறது.