தமிழகத்தின் தொழிலாளர் நலத்துறை அமைச்சராக இருந்து வரும் நிலோபர் கஃபே கடந்த ஏப்ரல் 9 ஆம் தேதி ஒரு திருமணத்தில் கலந்து கொண்டார். வேலூர் மாவட்டம் வாணியம்பாடியில் இத்திருமணம் நடைபெற்றது. இதில் கலந்துகொண்ட 35க்கும் மேற்பட்ட பெண்கள் மற்றும் குழந்தைகள் கொரோனா அறிகுறியால் தற்போது தனிமைப்படுத்தப்பட்டனர். அவர்களுக்கு கொரோனா பரிசோதனையும் செய்யப்பட்டது. சோதனையில் கடந்த திங்கள்கிழமை பெண் ஒருவருக்கு கொரோனா நோய்த்தொற்று இருப்பது உறுதிசெய்யப்பட்ட நிலையில் சிகிச்சைக்கு அனுமதிக்கப்பட்டுள்ளார்.

இந்நிலையில் ஏப்ரல் 11 ஆம் தேதி தமிழக முதல்வர் கூட்டிய அவரச ஆலோசனைக் கூட்டத்திலும் நிலோபர் கஃபே கலந்துகொண்டார் என்பதும் குறிப்பிடத்தக்கது. இதுவரை அமைச்சருக்கு கொரோனா அறிகுறிகள் எதுவும் தென்படவில்லை. நேற்று மாலை வரை அமைச்சர் தனிமைப்படுத்தலுக்கு அறிவுறுத்தப்படவில்லை என்ற தகவலும் வெளியாகியுள்ளது. தமிழகத்தில் கொரோனா பாதிப்பு எண்ணிக்கை அதிகரித்து வரும் நிலையில் அமைச்சர் கலந்துகொண்ட நிகழ்ச்சியில் ஒருவருக்கு கொரோனா உறுதிசெய்யப்பட்டு இருப்பது அச்சத்தை ஏற்படுத்தியுள்ளது.