కరోనా భయం: ఫ్రెండ్ దగ్గుతున్నాడని కాల్చేశాడు..!
- IndiaGlitz, [Wednesday,April 15 2020]
రోనా.. కరోనా.. ఉదయం నిద్రలేచింది మొదలుకుని మళ్లీ నిద్రపోయే వరకూ ఆ మహమ్మారి భయమే. ఎవరు దగ్గుతున్నా.. తుమ్ముతున్నా వారిపై అనుమానమే. మరోవైపు ఎవరైనా అనుమానంగా కనపడితే చాలు ఇక అంతే సంగతులు. మరీ ముఖ్యంగా తమను చూసి ఎవరైనా అదే పనిగా దగ్గుతున్నా.. తుమ్మినా ఇక ఎదుటి వ్యక్తి ఎంత చికాకు పుడుతుందో.. ఒకసారి అర్థం చేస్కోండి. ఇలా చేస్తున్నాడనే తన మిత్రుడినే మరో ఫ్రెండ్ కాల్చేశాడు. ఈ ఘటన గ్రేటర్ నోయిడాలో చోటుచేసుకుంది.
అసలేం జరిగింది!?
పూర్తి వివరాల్లోకెళితే.. గ్రేటర్ నోయిడాలోని దయానగర్‌కు చెందిన ప్రశాంత్‌సింగ్ అలియాస్ ప్రవేశ్ (25), జై వీర్‌సింగ్ అలియాస్ గుల్లూ (30) ఇద్దరు మంచి మిత్రులు. ఇద్దరూ వ్యవసాయం చేస్తూ జీవనం సాగిస్తుంటారు. నిన్న రాత్రి ప్రశాంత్ మరో ముగ్గురు స్నేహితులతో కలిసి దయానగర్ ఆలయంలో లూడో ఆడుతున్నాడు. అదే సమయంలో జై వీర్ అక్కడికి వచ్చాడు. అతడ్ని చూసిన ప్రశాంత్.. పదే పదే దగ్గడం మొదలెట్టాడు. దీంతో గుల్లూకు చిరాకేసింది. ఎందుకిలా చేస్తున్నావ్..? ఏమైంది నీకు..? నన్ను చూసే ఎందుకిలా దగ్గుతున్నావ్..? అంటూ ఒకరినొకరు తిట్టుకున్నారు. దీంతో ఆ గొడవ కాస్త ముదరడంతో సహనం కోల్పోయిన గుల్లూ తన జేబులోంచి తుపాకీ తీసి ప్రవేశ్‌పై ఒక్కసారిగా కాల్పులు జరిపాడు. ఈ ఘటనలో అక్కడికక్కడే ప్రవేశ్ కుప్పకూలిపోయాడు. అప్రమత్తమైన తోటి మిత్రులు హుటాహుటిన ప్రవేశ్‌ను ఆస్పత్రికి తరలించారు.
ఇదీ పరిస్థితి..
ప్రస్తుతం ఆయన పరిస్థితి నిలకడానే ఉందని వైద్యులు తెలిపారు. సమాచారం అందుకున్న పోలీసులు కేసు నమోదు చేసుకుని దర్యాప్తు చేస్తున్నారు. చూశారుగా పరిస్థితి ఎలా ఉందో.. ఒకప్పుడు దగ్గినా.. తుమ్మినా అర్థాలు వేరేగా ఉండేవి.. కానీ ఈ టైమ్‌లో ఆ రెండూ చేసినా అచ్చు తప్పే.. మరీ ముఖ్యంగా పనిగట్టుకుని మరీ చేస్తే పరిస్థితులు ఎలా ఉంటాయో పైన చెప్పిన ఘటనే ఇందుకు చక్కటి ఉదాహరణ.