ప్రపంచాన్ని కరోనా మహమ్మారి వణికిస్తోంది. భారతదేశంలోనూ రోజురోజుకూ కేసుల సంఖ్య పెరిగిపోతోంది. కరోనా కట్టడికై కేంద్ర, రాష్ట్ర ప్రభుత్వాలు సాయశక్తులా ప్రయత్నాలు చేస్తున్నప్పటికీ కేసులు సంఖ్య మాత్రం ఊహించని రీతిలో పెరిగిపోతుండటంతో కఠిన చర్యలు తీసుకోవడం ప్రారంభించాయి. ఈ తరుణంలో లాక్‌డౌన్‌ను మరింత కఠినంగా అమలు చేస్తోంది. మరోవైపు రోజుకో కొత్త నిర్ణయం తీసుకుంటూ అమలు చేస్తోంది. ఇదిలా ఉంటే.. అమర్‌ నాథ్ యాత్ర విషయంలోనూ కేంద్రం కీలక నిర్ణయం తీసుకుంది.

ఈ ఏడాది అమర్ నాథ్ యాత్ర రద్దు చేయాలని కేంద్రం నిర్ణయం తీసుకుంది. ఈ మేరకు శ్రీ అమర్‌నాథ్‌జీ ఆలయ బోర్డు (SASB) ఓ ప్రకటనలో తెలిపింది. కాగా.. బుధవారం నాడు జమ్మూకాశ్మీర్ లెఫ్టినెంట్ గవర్నర్, SASB ఛైర్మన్ గిరీష్ చంద్ర ముర్ము నేతృత్వంలో బోర్డు సమావేశం జరిగింది. ఈ సమావేశంలో అమర్‌నాథ్ యాత్రను రద్దు చేయాలని నిర్ణయించుకున్నారు. కాగా జూన్ 23 నుంచి ఆగస్టు 03 వరకూ అమర్‌నాథ్ యాత్ర జరగాల్సి ఉండగా తాజాగా ప్రభుత్వం ఈ నిర్ణయం తీసుకుంది. కాగా.. యాత్ర సాగే మార్గాల్లో 77 రెడ్ జోన్లు ఉండటంలో భక్తులు కరోనా వైరస్ బారినపడే ప్రమాదముందని ఈ నిర్ణయం తీసుకోవడం జరిగింది.