தளபதி விஜய் தான் வாங்கிய ரோல்ஸ் ராய்ஸ் காருக்கு நுழைவு வரியிலிருந்து விலக்கு வேண்டும் என்று சென்னை உயர் நீதிமன்றத்தில் வழக்கு தொடர்ந்தார். இந்த வழக்கை நேற்று தள்ளுபடி செய்த நீதிமன்றம், விஜய்க்கு ஒரு லட்ச ரூபாய் அபராதம் விதித்தது. அதுமட்டுமின்றி சினிமாவில் ஹீரோவாக இருந்தால் மட்டும் போதாது என்றும், நிஜ வாழ்விலும் ஹீரோவாக இருக்க வேண்டும் என்றும், வரி கட்டுவது ஒவ்வொரு குடிமகனின் பங்களிப்பு என்றும் தெரிவித்து இருந்தது.

நீதிபதியின் இந்த கருத்தும் அபராதமும் பெரும் பரபரப்பை ஏற்படுத்திய நிலையில் விஜய்க்கு ஆதரவாகவும், விஜய்க்கு கண்டனம் தெரிவித்தும் பல்வேறு கருத்துக்கள் சமூக வலைதளங்களில் பதிவாகி வருகின்றன என்பது குறிப்பிடத்தக்கது.

இந்த நிலையில் பாஜக பிரபலம் நடிகை காயத்ரி ரகுராம் ஏற்கனவே விஜய்க்கு ஆதரவு தெரிவித்துள்ள நிலையில் தற்போது காங்கிரஸ் கட்சியின் எம்பி கார்த்திக் சிதம்பரம், விஜய்க்கு ஆதரவு தெரிவித்துள்ளார். இந்திய குடிமக்கள் யாராக இருந்தாலும் தனக்கு வரி குறைப்பு கேட்டு முறையிடுவது அவர்களது உரிமை என்றும் அவர்களை நடிகன் என்று பார்ப்பது தவறு என்றும் தெரிவித்துள்ளார். கார்த்தி சிதம்பரத்தின் இந்த கருத்து பெரும் பரபரப்பை ஏற்படுத்தி உள்ளது.