'కేజీఎఫ్‌' హీరో యశ్‌పై కలెక్టర్‌కు ఫిర్యాదు
- IndiaGlitz, [Monday,March 15 2021]
‘కేజీఎఫ్‌’ ఫేమ్‌.. హీరో యశ్‌పై రాజ్య రైతు సంఘం కార్యాధ్యక్షుడు అణ్ణాజప్ప హాసన్‌ జిల్లా కలెక్టర్‌కు ఫిర్యాదు చేశారు. యశ్ తల్లిదండ్రులు ఇటీవల దుద్ధ హోబళి తిమ్మాపుర గ్రామంలో కొనుగోలు చేసిన భూమిలో అక్రమంగా ప్రహరీ నిర్మించి రైతులకు ఇబ్బందులకు గురి చేశారని తన ఫిర్యాదులో అణ్ణాజప్ప పేర్కొన్నారు. గూండాలను రప్పించి గ్రామస్తులను యశ్ భయపెడుతున్నట్లు ఆరోపించారు. రైతులకు న్యాయం చేయాలని విజ్ఞప్తి చేశారు. ఇప్పటికే భూ వివాదానికి సంబంధించిన కేసు పోలీస్ స్టేషన్‌కు ఎక్కింది.
అసలేం జరిగిందంటే.. యశ్ తల్లిపై ఆమె సొంత గ్రామస్తులంతా ఇటీవల గొడవకు దిగారు. యశ్ తల్లి తమ పొలం నుంచి ఉన్న దారిని మూసివేయడంతో ఆ గ్రామానికి చెందిన రైతులంతా తీవ్ర ఇబ్బందులకు గురవుతున్నారు అదేమని ప్రశ్నించినా ఆమె ఏమాత్రం వెనక్కి తగ్గడం లేదు. దీంతో ఆ గొడవ పోలీస్ స్టేషన్‌కు చేరుకుంది. యశ్ తల్లి పుష్పలత స్వగ్రామం కర్ణాటకలోని హాసన్‌ జిల్లా. అక్కడ యశ్ కుటుంబానికి సొంత ఇల్లు ఉంది. అయితే ఇటీవల యశ్ కుటుంబం హాసన్‌ సమీపంలోని తిమ్మాపుర గ్రామంలో ఇటీవల 80 ఎకరాల భూమిని కొనుగోలు చేసింది.
అంత వరకూ బాగానే ఉంది కానీ ఆ 80 ఎకరాల పొలం నుంచి ఇతర రైతులకు తమ పొలాలకు వెళ్లాల్సిన బాట ఉంది. దానిని పుష్పలత మూసి వేయించడంతో గ్రామస్తులు తీవ్ర ఆగ్రహానికి గురయ్యారు. ఇదేమని ప్రశ్నించినా ఆమె వినలేదు. తమ పొలాలకు దారిని మూసివేశారంటూ గ్రామస్తులు యశ్ తల్లి పుష్పలతతో గొడవ పడ్డారు. వివాదం పెద్దది కావడంతో పాటు ఆమె వినే పరిస్థితి లేకపోవడంతో గ్రామస్తులు చేసేదేమీ లేక దుద్ద పోలీస్‌స్టేషన్లో ఫిర్యాదు చేశారు. తాజాగా యశ్‌పై అణ్ణాజప్ప కలెక్టర్‌కు ఫిర్యాదు చేశారు.