'ఇంద్ర', 'అజ్ఞాతవాసి'.. కొన్ని కామన్ పాయింట్స్
- IndiaGlitz, [Tuesday,January 02 2018]
కొన్ని విషయాలు యాదృచ్ఛికంగా జరిగినా భలే సరదాగా, గమ్మత్తుగా ఉంటాయి. ఒకవేళ ఆ విషయాలు సినిమాలకు సంబంధించిన‌వైతే.. అవి ఇంకా ఆసక్తిని రేకెత్తిస్తాయి. ఇలాంటి ఓ యాదృచ్ఛిక విషయం మెగా సోదరుల మధ్య జరిగితే ఇంకెంత ఆసక్తి ఉంటుంది? సరిగ్గా ఇలాంటి విషయమే వారి సినిమాల్లో జరిగింది. అవే చిరంజీవి నటించిన చూడాలని ఉంది', పవన్ కల్యాణ్ నటించిన ఖుషి' సినిమాలు. నిశితంగా పరిశీలిస్తే ఈ రెండు సినిమాలు కూడా కలకత్తా నేపథ్యంలో తెరకెక్కినవే. రెండూ సూపర్ హిట్ మూవీలే. మళ్ళీ ఇలాంటి విషయాలే పవన్ నటించిన అజ్ఞాతవాసి' విష‌యంలో పునరావృతం కానున్నాయి.
16 ఏళ్ల క్రితం చిరు నటించిన ఇంద్ర', ఇప్పుడు పవన్ నటించిన అజ్ఞాతవాసి'.. రెండూ కూడా వారణాసి నేపథ్యంలో రూపుదిద్దుకున్నాయి. ఇంద్ర' వైజయంతి మూవీస్ సంస్థ‌కి సిల్వర్ జూబిలీ ఇయ‌ర్‌ ఫిలిం.. బి.గోపాల్, చిరంజీవి కాంబినేషన్లో 3వ సినిమా. అలాగే అజ్ఞాతవాసి' పవన్ కి సిల్వర్ జూబిలీ సినిమా కాగా.. అలాగే త్రివిక్రమ్, పవన్ కలయికలో 3వ చిత్రం. ఈ రెండు సినిమాలలో కూడా ఇద్దరు కథానాయికలు...అలాగే ఆయా హీరోలతో మొదటి సారిగా నటించారు. ఇక ఈ రెండు చిత్రాలకి ఎడిటరుగా కోటగిరి వెంకటేశ్వర రావు పనిచేసారు. ఇంద్ర'లో గాన గంధర్వుడు బాలసుబ్రహ్మణ్యం అతిథి పాత్రలో మెరవగా.. విక్టరీ వెంకటేష్ అజ్ఞాతవాసి'లో అతిథి పాత్రతో సంద‌డి చేయ‌నున్నారు. మరో ఆసక్తికరమైన విషయమేమిటంటే...అజ్ఞాతవాసి' సినిమాకి వాడిన ట్యాగ్ లైన్ ప్రిన్స్ ఇన్ ఎక్సైల్' ఈ రెండు సినిమాలకి సరిగ్గా సరిపోతుంది. ఎందుకంటే.. రెండు సినిమాల్లోనూ హీరో అజ్ఞాతంలో ఉండే వాతావ‌ర‌ణం ఉంటుంది. ఇన్ని అంశాలు కలగలసిన ఈ రెండు సినిమాల్లో ఇంద్ర' చిరంజీవి కెరీర్లో బ్లాక్ బస్టర్ గా, ఇండ‌స్ట్రీ హిట్‌గా నిలిచిపోయింది. మరి అజ్ఞాతవాసి' పవన్‌కి ఏ రేంజ్ లో ప్లస్ అవుతుందో వేచి చూడాలి.