சூப்பர் ஸ்டார் ரஜினிகாந்த் சமீபத்தில் தனது ரசிகர்களை சந்தித்தபோது அரசியல் குறித்து பேசிய பரபரப்பான பேச்சு தமிழக அரசியலில் பெரும் சுனாமியை ஏற்படுத்தியது. அவர் கன்னடர், அதனால் தமிழக அரசியலுக்கு வரக்கூடாது என்று ஒருசிலர் எதிர்ப்பு தெரிவித்து வருகின்றனர். ஆனால் பெரும்பாலான ரசிகர்களும், பொதுமக்களும் அவர் அரசியலுக்கு வரவேண்டும் என்று கூறுவதாக பத்திரிகைகளின் சர்வே கூறுகின்றது.

இந்த நிலையில் ரஜினிகாந்த் அரசியலுக்கு வருவது குறித்து பிரபல நகைச்சுவை நடிகரும் அதிமுக ஆதரவாளருமான செந்தில் கூறுகையில், "தமிழக அரசியலில் இப்போதிருக்கும் நிலைமை தொடர்ந்து நீடித்தால் ரஜினி நிச்சயம் அரசியலுக்கு வருவார். ரஜினி அரசியலுக்கு வரட்டும். அதற்கு அவர் இந்தியர் என்ற ஒரு தகுதி போதும்" என்று கூறியுள்ளார்.

மேலும் அதிமுக குறித்து செந்தில் கூறியபோது, 'அதிமுகவினர் அனைவரும் ஒற்றுமையாக இருந்து கட்சியை நடத்துவதுதான் இப்போதைய தேவை. பதவிகளை சிலரே வைத்துக்கொள்ளாமல் பிற எம்ஏல்ஏகளுக்கு பகிர்ந்தளிக்க வேண்டும்' என்று கூறியுள்ளார்

ரஜினியுடன் பல படங்களில் நகைச்சுவை வேடத்தில் நடித்துள்ள செந்தில் அதிமுக ஆதரவாளராக இருந்தும் ரஜினியை அரசியலுக்கு வருமாறு அழைப்பு விடுத்திருப்பது அவருடைய அரசியல் நாகரீகத்தை காட்டுவதாக சமூக வலைத்தளங்களில் பலர் கருத்து தெரிவித்து வருகின்றனர்.