இந்திய திரையுலகில் வாழ்க்கை வரலாறு திரைப்படங்கள் எடுப்பதற்கு புதிதல்ல. தோனி, சச்சின், ஜெயலலிதா உள்பட பல பிரபலங்களின் வாழ்க்கை வரலாறு திரைப்படங்கள் மக்கள் மத்தியில் நல்ல வரவேற்பை பெற்றுள்ளன. அந்த வகையில் தமிழக முதல்வர் முக ஸ்டாலின் அவர்களின் வாழ்க்கை வரலாறு திரைப்படம் உருவாக்க ஏற்பாடுகள் நடந்து கொண்டிருப்பதாக தகவல்கள் வெளியாகி உள்ளன.

பிரபல குணசித்திர நடிகரும் ’கன்னிமாடம்’ என்ற திரைப்படத்தை இயக்கிவருமான போஸ் வெங்கட் இந்த படத்தை இயக்க இருப்பதாகவும் இதற்காக அவர் முதல்வரின் வாழ்க்கை வரலாற்றை ஆய்வு செய்து வருவதாகவும் கூறப்படுகிறது. இந்த படத்தின் கதை எழுதும் பணியை அஜயன்பாலா மேற்கொண்டு வருவதாகவும் தமிழக முதல்வரின் ஒப்புதல் கிடைத்ததும் இந்த படம் குறித்த அறிவிப்பு வெளியாகும் என்றும் கூறப்படுகிறது.

தமிழக முதல்வர் முக ஸ்டாலின் கேரக்டரில் சமுத்திரகனி நடிக்க அதிக வாய்ப்பு இருப்பதாகவும், இசைப்புயல் ஏஆர் ரகுமான் இந்த படத்திற்கு இசையமைக்க வாய்ப்பிருப்பதாகவும் கூறப்படுகிறது .

இந்த படம் குறித்த அதிகாரப்பூர்வ அறிவிப்பு விரைவில் வெளியாகும் என்றும் 2024 ஆம் ஆண்டு பாராளுமன்ற தேர்தலை கணக்கில் கொண்டு இந்த படம் உருவாக்கப்பட்டு வருகிறது என்றும், இந்த படத்தில் தமிழக முதல்வர் முக ஸ்டாலின் அவர்களின் எமர்ஜென்சி காலத்தில் பட்ட துன்பங்கள், அவர் படிப்படியாக தலைவராக உருவெடுத்த காட்சிகள் அடங்கி இருக்கும் என்றும் எதிர்பார்க்கப்படுகிறது.