రాష్ట్ర ప్రజలకు సీఎం జగన్ మరో శుభవార్త అందించారు. వైఎస్ఆర్ ఆరోగ్యశ్రీ కింద 25 లక్షల రూపాయల వరకూ ఉచితంగా వైద్యం అందించాలని అధికారులను ఆదేశించారు. తాడేపల్లి క్యాంప్ కార్యాలయంలో ఆరోగ్యశ్రీపై అధికారులతో సమీక్షా సమావేశం నిర్వహించారు. ఈ సందర్భంగా జగన్ మాట్లాడుతూ ఆంధ్రప్రదేశ్‌లో ఇది చరిత్రాత్మక నిర్ణయమని.. డిసెంబర్ 18 నుంచి రూ.25లక్షల వరకూ ఉచితంగా వైద్యం అందించాలని స్పష్టం చేశారు. ఆరోగ్యశ్రీ కార్డు ఉన్న ప్రతి వ్యక్తికి రూ.25 లక్షలు వరకూ వైద్యం ఉచితంగా లభిస్తుందన్నారు. అలాగే ఆరోగ్యశ్రీ కింద చికిత్స చేయించుకున్న వారికి డాక్టర్ చెకప్ కోసం రవాణా ఛార్జీల కింద రూ.300 సైతం చెల్లించాలని సూచించారు.

వైఎస్‌ఆర్ ఆరోగ్య శ్రీ కింద ఉచితంగా వైద్యం పొందడం ఎలా? అన్న దానిపై రూపొందించిన వీడియోను అందరికీ పంపించాలని అధికారులను ఆదేశించారు. ప్రతి ఒక్కరూ ఆరోగ్య శ్రీ యాప్‌ డౌన్లోడ్‌ చేసుకునేలా చూడాలని సమీక్షా సమావేశంలో ఆయన సూచించారు. ఆరోగ్యం, విద్య అనేవి ప్రజలకు ఒక హక్కుగా లభించాలని.. ఈ హక్కులను కాపాడటం ప్రభుత్వ బాధ్యతని ఆయన గుర్తుచేశారు. అందుకే అధికారంలోకి వచ్చిన రోజు నుంచే ప్రభుత్వం ఈ అంశాలపై విశేష కృషి చేసిందని వివరించారు. పేద ప్రజలకు ఎలాంటి వైద్యం అవసరమైనా రూ.25 లక్షల వరకూ చికిత్స ఉచితంగా లభిస్తుందన్న భరోసా ఇవ్వాలని పేర్కొన్నారు.

ప్రతి మండలంలో వారానికి నాలుగు గ్రామాల చొప్పున ఆరోగ్యశ్రీ కార్డుల పంపిణీ చేపట్టాలని ఆదేశించారు. జనవరి నెలాఖరు నాటికి దీనిని పూర్తిచేయాలని స్పష్టం చేశారు. వైఎస్ఆర్ ఆరోగ్య శ్రీ కింద ఉచితంగా వైద్యం ఎలా పొందాలో పెద్ద ఎత్తున ప్రచారం చేయాలన్నారు. ఈ ప్రచారంలో ప్రజాప్రతినిధులు పాల్గొనాలని ఆదేశించారు. ఇక ఫేజ్-2 ఆరోగ్య సురక్షను జనవరి ఒకటో తేదీ నుంచి ప్రారంభించాలన్నారు. ఉద్దానం ప్రాంతంలో కిడ్నీ రోగులకు అందుతున్న వైద్య సేవలు.. రాష్ట్రంలోని మిగతా ప్రాంతాల్లో కూడా అందించాలని సూచించారు. అలాగే డయాలసిస్‌ రోగులు వాడుతున్న మందులు విలేజ్‌ హెల్త్‌ క్లినిక్స్‌లో అందుబాటులోకి తీసుకురావాలని సీఎం జగన్ సూచించారు.