கோலிவுட் திரையுலகில் கமல்ஹாசனுக்கு அடுத்து ஒரு கேரக்டருக்காக அதிகம் உழைப்பவர் விக்ரம் என்பது தெரிந்ததே. வித்தியாசமான வேடங்களை ஏற்று தான் ஏற்றுக்கொண்ட கேரக்டராகவே வாழ்ந்து வரும் விக்ரம் தற்போது துருவ நட்சத்திரம்' மற்றும் 'ஸ்கெட்ச்' ஆகிய படங்களில் நடித்து வருகிறார். இவற்றில் 'ஸ்கெட்ச்' திரைப்படம் வரும் பொங்கல் திருநாளில் வெளியாகவுள்ளது.

இந்த நிலையில் நியூயார்க்கை சேர்ந்த நிறுவனம் ஒன்று தயாரிக்கவிருக்கும் படத்தில் விக்ரம் நடிக்கவுள்ளார். ஆர்.எஸ்.விமல் என்ற மலையாள இயக்குனர் இயக்கவுள்ள இந்த சரித்திர படத்திற்கு 'மகாவீர் கர்ணன்' என்ற டைட்டில் வைக்கப்பட்டுள்ளதாகவும், டைட்டில் ரோலான கர்ணன் கேரக்டரில் விக்ரம் நடிக்கவிருப்பதாகவும் செய்திகள் வெளிவந்துள்ளது.

இந்தி, தமிழ் உள்பட பல மொழிகளில் உருவாகவுள்ள இந்த படம் ரூ.300 கோடி பட்ஜெட்டில் உருவாகவுள்ளதாகவும், உலகம் முழுவதிலும் இருந்து பல டெக்னீஷியன்கள் இந்த படத்தில் பணிபுரியவுள்ளதாகவும் கூறப்படுகிறது. இந்த ஆண்டு அக்டோபர் மாதம் இந்த படத்தின் படப்பிடிப்பு தொடங்கும் என்றும் 2019ஆம் ஆண்டு இந்த படத்தை வெளியிட திட்டமிட்டுள்ளதாகவும் கூறப்படுகிறது.