‘అల వైకుంఠపురములో..’ బ్లాక్ బస్టర్ హిట్టవ్వడంతో మాటల మాంత్రికుడు త్రివిక్రమ్ రేంజ్ మారిపోయింది. ఆయనతో సినిమాలు చేయడానికి కుర్ర, సీనియర్ హీరోలు ముందుకొస్తున్నారు. ఈ క్రమంలో మెగాస్టార్ చిరంజీవితో కూడా సినిమా చేయడానికి త్రివిక్రమ్ సిద్ధమైనట్లు గత కొన్నిరోజులుగా పెద్ద ఎత్తున వార్తలు వినిపిస్తున్నాయి. అయితే.. దీనిపై ఇంతవరకూ అధికారిక ప్రకటన రాలేదు కానీ పుకార్లు మాత్రం గట్టిగానే షికార్లు చేస్తున్నాయి.

తాజాగా.. ఇదిగో త్రివిక్రమ్-చిరు మూవీ ఇలా ఉండబోతోందని కూడా సోషల్ మీడియాలో.. పలు వెబ్ సైట్లలో కథనాలు వచ్చేస్తున్నాయి. వాస్తవానికి త్రివిక్రమ్ సినిమా అంటే డైలాగ్స్, కామెడీ, పంచ్‌లకు ఎలాంటి కొదువ ఉండదు. అంతేకాదు.. మాటల మాంత్రికుడు ఫుల్ లెంగ్త్ కామెడీ సినిమా చేసి కూడా చాలా రోజులే అయ్యింది. అయితే మెగాస్టార్‌తో కామెడీ సినిమా తెరకెక్కించాలని భావిస్తున్నాడట. సినిమా మొత్తం కామెడీ పండుతుందట. అంటే.. మెగాభిమానులను మాంత్రికుడు.. కడుపుబ్బా నవ్వించబోతున్నాడన్న మాట. ఈ వార్త విన్న మెగాభిమానులు సంబరపడిపోతున్నారు.

చిరంజీవి అప్పుడెప్పుడో ‘అందరివాడు’, ‘శంకర్ దాదా ఎంబీబీఎస్’ సినిమాల్లో కామెడీ పిచ్చాపాటిగా పండించారే గానీ ఆ తర్వాత అంతంత మాత్రమే. అందుకే కామెడీ అనే సరికి చిరు కూడా త్రివిక్రమ్ కథకు ఒప్పుకున్నాడట. ఇప్పటికే యంగ్ టైగర్ ఎన్టీఆర్‌తో సినిమా తెరకెక్కిస్తున్నట్లు త్రివిక్రమ్ ప్రకటించాడు. ఈ సినిమా పూర్తవ్వగానే చిరుతో సినిమా ఉంటుందని సమాచారం. అంతలోపు కొరటాల శివతో ‘ఆచార్య’ సినిమా కూడా పూర్తవుతుందని.. ఇక చిరు కూడా ఫ్రీ అవుతారని.. అప్పుడే సినిమా సెట్స్‌పైకి తీసుకెళ్లాలని త్రివిక్రమ్ భావిస్తున్నారట. ఇందులో నిజానిజాలెంతో తెలియాలంటే అధికారిక ప్రకటన వచ్చేంతవరకూ వేచి చూడాల్సిందే.