మెగాహీరో సాయిధరమ్‌ తేజ్.. ప్రతి సినిమాకి ఒకేలా కష్టపడే హీరో. ఈ యువ క‌థానాయ‌కుడు న‌టించ‌గా ఈ సంవత్సరం విడుదలైన సినిమాలన్నీ బాక్సాఫీస్ దగ్గర అనుకున్నంత విజయం సాధించలేకపోయాయి. కాని పట్టు వదలకుండా ఒకే ఎనర్జీతో సినిమాలను చేస్తున్న ఈ యంగ్‌ హీరో.. ప్రస్తుతం వి.వి.వినాయక్ డైరెక్షన్లో ఒక సినిమా చేస్తున్న విషయం తెలిసిందే.

ఈ సినిమా కోసం చిరంజీవి పాట‌ని రీమిక్స్ చేయ‌బోతున్నార‌ని వార్త‌లు వినిపిస్తున్నాయి. రేయ్‌, సుబ్ర‌మ‌ణ్యం ఫ‌ర్ సేల్‌, సుప్రీమ్ చిత్రాల్లో ఇప్ప‌టికే చిరు పాట‌ల‌ను రీమిక్స్ చేసిన సాయిధ‌ర‌మ్ తేజ్‌.. ఈసారి 'కొండవీటి దొంగ' సినిమాలో 'ఛమక్ ఛమక్ ఝాం' పాటను రీమిక్స్ చేయడానికి సన్నాహాలు చేస్తున్నాడు.

అప్పట్లో ఇళయరాజా స్వరపరచిన ఈ పాటలో చిరు, విజయశాంతి స్టెప్స్ కి మెగా ఫాన్స్ ఫిదా అయిపోయారు. మరి ఇప్పుడు 28 సంవత్సరాల తర్వాత రాబోతున్నఈ రీమిక్స్ కి త‌మన్ సంగీత సారధ్యంలో...సాయిధరమ్ తేజ్, లావణ్య త్రిపాఠి వెండితెరపై ఏ విధంగా ప్రేక్షకులని అలరిస్తారో చూడాలంటే...ఫిబ్రవరి 9 వరకు వేచి ఉండాల్సిందే.