గొల్లపూడి గురించి మాట్లాడుతూ చిరు కంటతడి!
- IndiaGlitz, [Saturday,December 14 2019]
టాలీవుడ్ ప్రముఖ నటుడు, సుప్రసిద్ధ రచయిత, సంపాదకుడు, వ్యాఖ్యాత గొల్లపూడి మారుతీరావు కన్నుమూసిన సంగతి తెలిసిందే. అనారోగ్యంతో బాధపడుతున్న ఆయన గురువారం చెన్నైలోని లైఫ్‌లైన్‌ ఆస్పత్రిలో తుదిశ్వాస విడిచారు. కాగా.. రేపు అనగా ఆదివారం నాడు చెన్నైలో అంత్యక్రియలు జరగనున్నాయి. ఆయన్ను కడసారి చూసేందుకు నటీనటులు చెన్నైకి చేరుకున్నారు. మరోవైపు చెన్నైలోని శారదాంబల్‌లోని ఆయన నివాసానికి సందర్శకులు భారీ సంఖ్యలో తరలివస్తున్నారు. శనివారం సాయంత్రం మెగాస్టార్ చిరంజీవి.. గొల్లపూడి భౌతికకాయానికి నివాళులు అర్పించారు. అనంతరం కుటుంబ సభ్యులను పరామర్శించారు. ఈ సందర్భంగా ఆయన మీడియాతో మాట్లాడిన ఆయన.. గొల్లపూడితో తనకున్న అనుబంధాన్ని పంచుకుని తీవ్ర భావోద్వేగానికి లోనయ్యారు.
నేను అస్సలు ఊహించలేదు!
‘గొల్లపూడితో నాకు సుదీర్ఘ అనుబంధం ఉంది. 1989లో మేమిద్దరం పరిచయం ఏర్పడింది. అప్పట్నుంచి ఇప్పటి వరకూ మా అనుబంధం కొనసాగింది. గొల్లపూడి వద్ద కొన్ని వారాల పాటు శిష్యరికం చేశాను. ఇంట్లో రామయ్య, వీధిలో కృష్ణయ్య చిత్రంలో గొల్లపూడితో కలిసి నటించాను. తన కుమారుడు శ్రీనివాస్ పేరిట అవార్డు ఇస్తూ ఆ కార్యక్రమానికి రావాల్సిందిగా ఆహ్వానించారు. అప్పుడే ఆయన్ను చివరిసారిగా చూశాను. ఇప్పుడిలా ఆయన నివాసానికి వచ్చి పార్థివదేహాన్ని చూడాల్సిన దురదృష్ట పరిస్థితి వస్తుందని అస్సలు ఊహించలేదు’ అని చిరంజీవి చెబుతూ ఒకింత కంటతడిపెట్టారు.