వయసు ఎక్కువైనా పర్లేదు.. సినిమాలు మాత్రం తగ్గనీయనంటున్నారు మెగాస్టార్ చిరంజీవి. ప్రస్తుతం ఏ హీరో చేతిలో లేనన్ని సినిమాలు మెగాస్టార్ చేతిలో ఉన్నాయి. అందుకే ఆయన టాక్ ఆఫ్ ది టౌన్. యంగ్ హీరోస్‌కో సవాల్. మొత్తం ఆయన చేతిలో ప్రస్తుతం ఐదు సినిమాలున్నాయని సమాచారం. ఏ హీరో చేతిలోనూ ఇన్ని సినిమాలు లేవు. ఇంకా మెగాస్టార్ ఓకే అనాలే కానీ దర్శకులు క్యూ కడతారు. అందులో ఎలాంటి సందేహమూ లేదు. దటీజ్ మెగాస్టార్ స్టామినా. ఇక ఆ ఐదు సినిమాలు ఏంటి? వాటిలో ఎన్ని విడుదల డేట్స్ ఫిక్స్ చేసుకున్నాయి? ఏ సినిమా ఏ దశలో ఉందనేది ఒక లుక్కేద్దాం.

చిరంజీవి ప్రస్తుతం కొరటాల శివ దర్శకత్వంలో రూపొందుతున్న ‘ఆచార్య’ సినిమాలో నటిస్తున్నారు. అవినీతి అక్రమాలను ప్రశ్నించే ఓ సోషల్ ఎలిమెంట్‌తో ఈ సినిమా తెరకెక్కుతోంది. ఈ చిత్రానికి మెగా పవర్ స్టార్ రామ్ చరణ్ ఓ ప్రత్యేక ఆకర్షణ. ఈ చిత్రం మే 13న ప్రపంచ వ్యాప్తంగా విడుదల కానుంది. దీని తర్వాత మోహన్‌రాజా దర్శకత్వంలో ‘లూసిఫర్‌’ పట్టాలెక్కనుంది. మలయాళంలో సూపర్ డూపర్ హిట్ కొట్టిన ‘లూసిఫర్’ను తెలుగు నేటివిటీకి తగినట్టుగా మార్పులు చేర్పులు చేసి.. మెగాస్టార్ హీరోగా రీమేక్ చేయనున్నారు. ఈ సినిమాకు సంబంధించి ఇంకా పూర్తి వివరాలు తెలియరాలేదు.

ఇక తమిళ మూవీ ‘వేదాళం’ను మెగాస్టార్ హీరోగా తెలుగులోనూ రీమేక్‌ చేయనున్నారు. ఈ సినిమాకు మెహర్‌ రమేశ్‌ దర్శకత్వం వహించనున్నారు. ఇదిలా ఉండగా.. యంగ్‌ డైరెక్టర్‌ బాబీ దర్శకత్వంలో ఓ సినిమా చేయనున్ననట్లు చిరంజీవి ఇప్పటికే స్వయంగా ప్రకటించిన విషయం తెలిసిందే. మరోవైపు.. క్రియేటివ్‌ డైరెక్టర్‌ ‘కృష్ణవంశీ’ ఇటీవల ప్రకటించిన ‘అన్నం’ చిత్రం కోసం చిరును సంప్రదించినట్లు వార్తలు వినిపిస్తున్నాయి. దీంతో కలిపి ప్రస్తుతం చిరు నటిస్తున్న.. నటించబోతున్న చిత్రాలు ఐదు అవుతున్నాయి. ఇవన్నీ ఖరారు అయితే.. చిరు అభిమానుల ఆనందానికి అవధులుండవు అనడంలో సందేహం లేదు.