"మెగాస్టార్ చిరంజీవి.. మైత్రీ మూవీ మేకర్స్ సంస్థ‌లో సినిమా చేయబోతున్నారా?" అంటే అవుననే అంటున్నాయి టాలీవుడ్ వర్గాలు.

కాస్త ఆ వివరాల్లోకి వెళితే.. 'శ్రీమంతుడు', 'జనతా గ్యారేజ్', 'రంగస్థలం' లాంటి బ్లాక్ బస్టర్ మూవీలను నిర్మించిన మైత్రీ మూవీ మేకర్స్ నిర్మాణంలో.. ఓ సినిమా చేయడానికి చిరంజీవి సిద్ధమైనట్లు సమాచారం. ప్రస్తుతం చిరు.. సురేందర్ రెడ్డి దర్శకత్వంలో రూపుదిద్దుకుంటున్న 'సైరా నరసింహారెడ్డి' చిత్రంలో నటిస్తున్న సంగ‌తి తెలిసిందే.

ఈ సినిమా పూర్తైన వెంటనే మైత్రీ మూవీ మేకర్స్ నిర్మించబోయే చిత్రంలో చిరు నటిస్తున్నారని తెలుస్తోంది. చిరు తనయుడు రామ్ చరణ్‌ను డైరెక్ట్ చేసిన సుకుమార్.. చిరు చిత్రానికి కూడా దర్శకత్వం వహించనున్నారని ప‌రిశ్ర‌మ వ‌ర్గాలు ముచ్చ‌టించుకుంటున్నాయి.

తాజాగా సుకుమార్, మైత్రీ మూవీ మేకర్స్ కాంబినేషన్‌లో విడుదలైన 'రంగస్థలం' జైత్ర‌యాత్ర‌ను కొనసాగిస్తున్న విషయం తెలిసిందే. గత రెండు నెలలుగా చిరు, సుకుమార్ కలయికలో సినిమా రాబోతున్నట్టు మీడియాలో వచ్చిన కథనాలను.. ఇటీవల సుకుమార్ ఖండించారు.

కాగా.. ఈ నేపథ్యంలో ఇప్పుడొస్తున్న వార్తలు అభిమానుల్లో ఆసక్తిని కలిగిస్తున్నాయి. త్వ‌ర‌లోనే చిరు, మైత్రీ మూవీ మేక‌ర్స్ కాంబినేష‌న్‌పై క్లారిటీ వ‌స్తుంది.