సింగింగ్ టాలెంట్‌ను క‌లుసుకున్న మెగాస్టార్
- IndiaGlitz, [Monday,November 26 2018]
మెగాస్టార్ చిరంజీవి సింగింగ్ సెన్సేష‌న్ బేబిని త‌న ఇంట్లో క‌లిశారు. అందుకు సంబంధించిన వీడియో ఒక‌టి ఇప్పుడు వైర‌ల్ అవుతుంది. సింగ‌ర్ బేబి చిరుని చూడ‌గానే ఎమోష‌న‌ల్ అయ్యారు. చిరు ఆమెను సాద‌రంగా ఆహ్వానించి మాట్లాడారు.
ప్లే బ్యాక్ సింగ‌ర్‌గా ఆమెకు స‌క్సెస్‌ఫుల్ కెరీర్ ఉండాల‌ని అభినందించారు. చిరు శ్రీమ‌తి సురేఖ కూడా బేబిని క‌లుసుకున్నారు. ప్ర‌ముఖ సంగీత ద‌ర్శ‌కుడు కోటి బేబి అడ్ర‌స్ కనుక్కుని ఆమెను చిరంజీవి ఇంటికి తీసుకెళ్లార‌ట. కోటి సంగీత దర్శకత్వంలో బేబి ఓ పాట‌ను పాడ‌బోతున్నారు.
బేబి త‌న‌కు వ‌చ్చిన పాట‌ల‌ను కొన్నింటిని చిరు, సురేఖ దంప‌తుల‌కు పాడి వినిపించింది. ఈ సంద‌ర్భంలో చిరంజీవి, ఆయ‌న భార్య‌ను క‌లుసుకోవ‌డం త‌న పూర్వ జ‌న్మ సుకృతంగా భావిస్తున్నాన‌ని చెప్పుకొచ్చారు బేబి.