ఫిల్మ్ సిటీలో మెగాస్టార్ కొత్త చిత్రం
- IndiaGlitz, [Saturday,October 05 2019]
'ఖైదీ నంబ‌ర్ 150'తో గ్రాండ్‌గా రీ-ఎంట్రీ ఇచ్చిన మెగాస్టార్ చిరంజీవి... తాజాగా హిస్టారిక‌ల్ డ్రామా 'సైరా.. న‌ర‌సింహారెడ్డి'తో మ‌రో భారీ విజ‌యాన్ని అందుకున్నారు. రెండు వ‌రుస బ్లాక్‌బ‌స్ట‌ర్స్‌తో తన స్టామినా ఏంటో మ‌రోసారి తెలియ‌జేసిన చిరు... ప్ర‌స్తుతం నెక్ట్స్ ప్రాజెక్ట్‌పై తన ఫోక‌స్‌ని షిప్ట్ చేశారు. 'మిర్చి, శ్రీ‌మంతుడు, జ‌న‌తా గ్యారేజ్‌, భ‌ర‌త్ అనే నేను' వంటి వ‌రుస విజ‌యాల‌తో ఫుల్ ఫామ్‌లో ఉన్న స‌క్సెస్‌ఫుల్ డైరెక్ట‌ర్ కొర‌టాల శివ కాంబినేష‌న్‌లో తన 152వ చిత్రం చేయ‌బోతున్నారు చిరు.
కొర‌టాల గ‌త చిత్రాల త‌ర‌హాలోనే మెసేజ్ ఓరియెంటెడ్ ఫిల్మ్‌గా తెర‌కెక్కనున్న మెగాస్టార్ 152కి సంబంధించి ఓ ఆస‌క్తిక‌ర‌మైన విష‌యం తెలిసింది. అదేమిటంటే.. ఈ సినిమాకి సంబంధించిన స్క్రిప్ట్ ఫైన‌ల్ వ‌ర్క్ ఫినిషింగ్ స్టేజెస్‌లో ఉంద‌ని... న‌వంబ‌ర్ నుంచి నిర‌వ‌ధికంగా చిత్రీక‌ర‌ణ సాగుతుంద‌ని స‌మాచారం. అంతేకాదు... రామోజీ ఫిల్మ్ సిటీలో ఇర‌వై రోజుల పాటు తొలి షెడ్యూల్ సాగుతుంద‌ని... ఈ భారీ షెడ్యూల్‌లో ప‌లు కీల‌క ఘ‌ట్టాల‌ను దృశ్యీక‌రిస్తార‌ని టాక్‌.
'ఖైదీ నంబ‌ర్ 150', 'సైరా న‌ర‌సింహారెడ్డి' చిత్రాల‌ను నిర్మించిన చిరు త‌న‌యుడు, మెగాప‌వ‌ర్ స్టార్ రామ్ చ‌ర‌ణ్... ఈ క్రేజీ ప్రాజెక్ట్‌ని కూడా ఎంతో ప్ర‌తిష్ఠాత్మ‌కంగా నిర్మించ‌నున్నారు. అయితే, గ‌త రెండు సినిమాల త‌ర‌హాలో సోలోగా కాకుండా మ్నాట్నీ ఎంట‌ర్‌టైన్‌మెంట్స్‌తో క‌ల‌సి చ‌ర‌ణ్ ఈ మూవీని ప్రొడ్యూస్ చేస్తుండ‌డం విశేషం.
మ‌రి... తాజా ఇన్నింగ్స్‌లో బ్యాక్ టు బ్యాక్ విజ‌యాలు చూసిన చిరు... నెక్ట్స్ మూవీతో హ్యాట్రిక్ అందుకుంటారేమో చూడాలి.