‘నువ్వా.. నేనా’ అంటూ రసవత్తరంగా జరుగుతున్న ‘మా’ ఎన్నికల్లో.. కొత్త అధ్యక్షుడు ఎవరు అనేది మరికొన్ని గంటల్లో తేలిపోనుంది. ఇప్పటి వరకూ 200 మందికి పైగా మా సభ్యులు ఓటు హక్కు వినియోగించుకున్నారు. ఆదివారం 11 గంటల సమయంలో మెగాస్టార్ చిరంజీవి, అక్కినేని నాగార్జున ఇద్దరూ ఒకే కారులో వచ్చి ఓటు హక్కు వినియోగించుకున్నారు. ఇద్దరూ ఇండస్ట్రీలో బెస్ట్ ప్రెండ్స్ అన్న విషయం తెలిసిందే.

నరేశ్‌‌కేనా కింగ్, మెగాస్టార్ మద్దతు..!?

కాగా.. ఇద్దరూ ఒకే కారులో రావడంతో ఓటేయాడానికి వచ్చిన నటీనటులు ఒకింత షాక్ అయ్యారు. ఇద్దరూ కలిసి రావడంతో ఈ రెండు కుటుంబాల మద్దతు ఒకరికే ఉంటుందని.. ఆయనెవరో కాదు నరేశ్ అని నటులు గుసగుసలాడుకుంటున్నారు. అంతేకాదు సూపర్‌స్టార్ ఫ్యామిలీ అంటే అక్కినేని, మెగా ఫ్యామిలీకి చాలా గౌరవముంది. ఆ ఇంట్లో ఏదైనా శుభకార్యం జరిగినా.. ముఖ్యంగా ఫంక్షన్స్ జరిగితే చాలు చిరు, నాగ్ కచ్చితంగా హాజరవుతుంటారు. అందుకే ఆ కుటుంబం నుంచి అధ్యక్ష పదవి బరిలో ఉన్న నరేశ్‌‌కే ఈ ఇద్దరు టాప్ హీరోల మద్దతు ఉంటుందని తెలుస్తోంది.

నరేశ్‌‌దే అధ్యక్ష పీఠం..!

ఇప్పటికే నరేశ్‌‌దే అధ్యక్ష పీఠం అందరూ అనుకుంటుండగా చిరు, నాగ్ ఇద్దరి సపోర్ట్ ఆయనకేనని తాజాగా తేలిపోయిందని అర్థం చేసుకోవచ్చు. ఇదిలా ఉంటే.. మా అధ్యక్ష పదవికోసం ఇంతవరకూ ఎవరూ రెండోసారి పోటీపడిన దాఖలాలు దాదాపు లేవనే చెప్పుకోవచ్చు. ఇది శివాజీ రాజాకు పెద్ద మైనస్ అని.. అప్పట్లో ఫిలింఛాంబర్ ముందు శ్రీరెడ్డి చేసిన వ్యవహారం శివాజీకి మరో మైనస్ అని విశ్లేషకులు చెబుతున్నారు. సో.. అధికారికంగా ప్రకటన కోసం ఆదివారం రాత్రి 8గంటల వరకు వేచి చూడాల్సిందే మరి.