స్టూడియోల కోసం చిరు, బాల‌య్య పోటీ..?
- IndiaGlitz, [Friday,June 12 2020]
టాలీవుడ్ అగ్ర క‌థానాయ‌కుల్లో చిరంజీవి, బాల‌కృష్ణ పేర్లు ప్ర‌ముఖంగా విన‌ప‌డుతుంటాయి. వీరిద్ద‌రు ఇప్పుడు స్టూడియోల నిర్మాణం కోసం పోటీలు ప‌డుతున్నారంటూ సోష‌ల్ మీడియాలో వార్త‌లు విన‌ప‌డుతున్నాయి. వివ‌రాల్లోకెళ్తే.. కొత్త‌గా ఏర్ప‌డ్డ తెలుగు రాష్ట్రం వైజాగ్‌లో సినీ ప‌రిశ్ర‌మ ఇంకా అభివృద్ధి కాలేదు. ప్ర‌భుత్వాలు ఆంధ్ర‌ప్ర‌దేశ్‌లో సినీ ప‌రిశ్ర‌మ‌కు చేయూత‌ను ఇస్తామ‌ని ప‌లు సంద‌ర్భాల్లో చెప్పాయి. అయితే ఇప్పుడిప్పుడే సినీ పెద్ద‌లు ఆంధ‌ప్ర‌దేశ్‌లో సినీ ప‌రిశ్ర‌మ డెవ‌ల‌ప్‌మెంట్ కోసం అడుగులు వేస్తున్నార‌ని తెలుస్తోంది.
మూవీ ఇండ‌స్ట్రీ డెవ‌ల‌ప్‌మెంట్ జ‌ర‌గాలంటే సినిమా షూటింగ్స్ ఎక్కువ‌గా జ‌ర‌గాలి. అంటే.. సినిమా షూటింగ్స్‌కు సంబంధించిన మౌలిక స‌దుపాయాలు ఏర్పాటు చేయాలి. అందుకోసం స్టూడియోలు నిర్మాణం జ‌ర‌గాలి. ఇప్ప‌టికే వైజాగ్‌లో రామానాయుడు స్టూడియో ఉంది. దీన్ని డెవ‌ల‌ప్ చేయ‌డానికి సురేష్‌బాబు త‌న వంతు ప్ర‌య‌త్నాలు చేస్తున్నాడు. కాగా మ‌రో ప‌క్క మెగాస్టార్ చిరంజీవి, నంద‌మూరి బాల‌కృష్ణ కూడా స్టూడియోలు నిర్మించాల‌ని అనుకుంటున్నార‌ట. తెలుగుదేశం ప్ర‌భుత్వం అధికారంలో ఉన్న‌ప్పుడే బాల‌కృష్ణ స్టూడియో నిర్మాణం కోసం స్థ‌లం కేటాయించాలంటూ అప్లికేష‌న్ పెట్టుకున్నాడు. కానీ అప్ప‌ట్లో ఎందుక‌నో చంద్ర‌బాబు అప్లికేష‌న్‌ను పెండింగ్‌లో ఉంచేశాడు. ఇప్పుడు జ‌గ‌న్ ఫ్ర‌భుత్వం వ‌చ్చింది క‌నుక అప్లికేష‌న్ గురించి ప‌ట్టించుకోవ‌డం లేద‌ని టాక్. అదే స‌మ‌యంలో చిరంజీవి త‌న‌కు తెలిసిన ప్ర‌భుత్వ పెద్ద‌ల స‌హ‌కారంతో జ‌గ‌న్ వ‌ద్ద స్టూడియో నిర్మాణానికి స్థ‌లం కేటాయించాలంటూ విజ్ఞ‌ప్తి చేశారంటూ వార్త‌లు విన‌ప‌డుతున్నాయి. మ‌రి స్టూడియోల నిర్మాణం కోసం చిరంజీవి, బాల‌కృష్ణ నిజంగానే పోటీ ప‌డుతున్నారా? ప‌డితే ఎవ‌రికి ముందుగా ప‌ర్మిష‌న్ వ‌స్తుంది? అనే విష‌యాలు తెలియాలంటే మాత్రం వేచి చూడాల్సిందే.