మీటూ ఉద్యమం ఉధృతంగా ఉన్నప్పుడు దక్షిణాదిలో సింగర్‌ చిన్మయి రైటర్‌ వైరముత్తుపై చేసిన ఆరోపణలు సంచలనాలకు దారి తీశాయి. తర్వాత చిన్మయి తన సోషల్‌ మీడియా అకౌంట్‌ ద్వారా అందరిపై విమర్శలు చేస్తూ వచ్చింది. ఇప్పుడు సింగర్‌ మనోపై ఆమె సంచలన ఆరోపణలు చేసింది. ఏడాదిన్నర కాలంలో ఎన్నో గుణపాఠాలు నేర్చుకున్నానని ఆమె తెలిపారు. సింగర్‌ మనో, కార్తీక మంచి సింగర్సేకానీ.. మంచి మగాళ్లు కాదు అంటూ చిన్మయి ఆరోపించారు. సోషల్‌ మీడియాలో చిన్మయి చేసిన ఈ ఆరోపణలు దుమారాన్ని రేపుతున్నాయి.

డబ్బింగ్‌ యూనియన్‌ ఎన్నికల గురించి తెలియజేస్తూ సింగర్‌ మనో ఓ వీడియో విడుదల చేశారు. దీనికి సంబంధించిన వీడియో పోస్ట్‌ చేసిన చిన్మయి ‘చాలా రోజుల క్రితం మనో నాకు ఫోన్‌ చేసి కార్తీక్‌ గురించి ఆరోపణలు చేస్తున్న వారందరినీ తీసుకుని తన ఇంటికి రమ్మన్నారు. ఈ వేధింపుల విషయంతో కార్తీక్‌ భార్య చాలా బాధపడుతుంది. తన కెరీర్‌ను ఎందుకు నాశనం చేస్తున్నావు. ఈ స్థాయికి రావడానికి నువ్వు చాలా కష్టపడ్డావు. అలాగే కార్తీక్‌ కూడా కష్టపడ్డాడు. అని రాజీ కుదిర్చే ప్రయత్నం చేశారు. నేను ఆయనలాగానే ఇబ్బందులు ఎదుర్కొని ఈ స్థాయికి వచ్చాను. అంతేకానీ ఇతరులను వేధించలేదు. ఈ ఏడాదిన్నరలో చాలా గుణపాఠాలు నేర్చుకున్నాను’ అని చిన్మయి తెలిపారు.