நடிகர் விஷால் ஆர்.கே.நகர் இடைத்தேர்தலில் போட்டியிட போவதாக நேற்று அதிகாரபூர்வமாக அறிவித்துள்ள நிலையில் அவரது இந்த முடிவுக்கு பெரும்பாலான திரையுலகினர் ஆதரவும், ஒருசிலர் எதிர்ப்பும் தெரிவித்து வருகின்றனர்.

இயக்குனர் சுசீந்திரன் உள்பட பலர் விஷாலின் அரசியல் எண்ட்ரிக்கு ஆதரவு தெரிவித்து வரும் நிலையில் நேற்று இயக்குனர் அமீர், விஷாலுக்கு எதிர்ப்பு தெரிவித்ததோடு தானும் ஆர்.கே நகரில் களமிறங்கவுள்ளதாக தெரிவித்தார்.

இந்த நிலையில் இயக்குனர் அமீரை அடுத்து இன்னொரு இயக்குனரான சேரன் தனது டுவிட்டர் பக்கத்தில் விஷாலுக்கு எதிர்ப்பு தெரிவித்துள்ளார். இதுகுறித்து அவர் குறிப்பிடுகையில், 'நேற்றுதான் அரசியல் பேசவேண்டாம் என நினைத்தேன்..இன்று பேசத்தூண்டுகிறது.விசால் போட்டியிடுவதை நண்பர்கள் எப்படிபார்க்கிறீர்கள் அனுமதிப்பது சரியா? என்று கேள்வி எழுப்பியுள்ளார். மேலும் 'அரசியல் என்ன மல்யுத்தமா.. வெறும் துணிச்சலை மட்டும் ரசித்துதான் இத்தனை வருடம் பாழாய்போனது தமிழகம்' என்று குறிப்பிட்ட சேரன், ஊடகம் தான் விஷால் செய்தியை பெரிதுபடுத்துவதாக தெரிவித்தார்.

இந்த நிலையில் விஷாலின் அரசியல் முடிவுக்கு நடிகையும் அரசியல்வாதியுமான குஷ்பு வாழ்த்து தெரிவித்துள்ளார்.