தென்னிந்திய நடிகர் சங்க தேர்தல் கடந்த ஆண்டு ஜூன் மாதம் நடந்த நிலையில் அந்த தேர்தல் செல்லாது என நீதிமன்றம் உத்தரவிட்டது. மேலும் புதிய தேர்தலை 3 மாதத்துக்குள் நடத்தி முடிக்க வேண்டும் என்று தனி நீதிபதி உத்தரவு பிறப்பித்திருந்தார் என்பது குறிப்பிடத்தக்கது.

இந்த நிலையில் நடிகர் சங்க தேர்தலை மூன்று மாதத்துக்குள் நடத்தி முடிக்க வேண்டும் என்ற தனி நீதிபதியின் உத்தரவுக்கு எதிர்ப்பு தெரிவித்து சென்னை உயர் நீதிமன்றத்தில் விஷால் மேல்முறையீட்டு மனு ஒன்றை தாக்கல் செய்தார்.

இந்த மேல்முறையீட்டு மனுவின் விசாரணை இன்று நடைபெற்ற நிலையில் நடிகர் சங்க தேர்தல் மூன்று மாதத்திற்குள் நடத்த வேண்டும் என்று தனிநீதிபதி பிறப்பித்த உத்தரவுக்கு இடைக்கால தடை விதிக்கப்பட்டது

மேலும் நடிகர் சங்கத்தை தனி அதிகாரியை தொடர்ந்து நிர்வகிக்கலாம் என்றும் விஷால் தாக்கல் செய்த மேல்முறையீட்டு மனுவுக்கு தமிழக அரசு ஏப்ரல் 8-ஆம் தேதிக்குள் பதிலளிக்க வேண்டும் என்றும் சென்னை உயர்நீதிமன்றம் உத்தரவிட்டுள்ளது. இந்த உத்தரவால் நடிகர் சங்க உறுப்பினர்களிடையே பெரும் பரபரப்பு ஏற்பட்டுள்ளது