விஷால் நிஜத்திலும் கதாநாயகன் தான் : சென்னை காவல்துறை பாராட்டு
- IndiaGlitz, [Wednesday,December 23 2015]
சமீபத்தில் சென்னையில் பெய்த கனமழை மற்றும் பெருவெள்ளம் காரணமாக கிட்டத்தட்ட சென்னையே மிதந்து பொதுமக்கள் பெரும் துயரம் அடைந்தனர். வெள்ளத்தால் பாதிக்கப்பட்ட மக்களுக்கு மத்திய, மாநில அரசு போதிய நிவாரண பணிகளை வழங்கியபோதிலும், தனியார் அமைப்புகள், தொண்டு நிறுவனங்கள் மற்றும் திரையுலகினர் மற்றும் பலர் தங்கள் சொந்த வேலையையும் பொருட்படுத்தாது நிவாரண பணியில் ஈடுபட்டனர்.
திரைத்துறையை பொறுத்தவரையில் சித்தார்த், விஷால், கார்த்தி உள்பட பலர் நிவாரண பணியில் தீவிரமாக ஈடுபட்டனர். இந்நிலையில் வெள்ளம் ஏற்பட்ட நேரத்தில் பாதிக்கப்பட்ட மக்களுக்கு உதவிகளையும், வெள்ள நிவாரண பொருட்களையும் வழங்கிய விஷாலுக்கு நன்றி தெரிவித்து கொள்வதாக சென்னை காவல் துறை அறிவித்துள்ளது.
இதுகுறித்து சென்னை காவல்துறையினர் கூறியபோது, "நடிகர் விஷால் மழை வெள்ளத்தால் பாதிக்கப்பட்ட மக்களுக்கு உதவிகளையும், வெள்ள நிவாரண பொருட்களையும் வழங்கி இருக்கிறார். வெள்ளத்தால் பாதிக்கப்பட்ட மக்களை மீட்க திறமையுடனும் தன் குடும்பத்தை பாராமலும் இரவு பகலாய் பணிபுரிந்த காவல் துறை நண்பர்களின் சுமார் 1200 குடுபங்களுக்கு, உதவும் விதத்தில் நிவாரண உதவிகளையும் வழங்கினார். இதற்காக சென்னை காவல் துறை சார்பில் விஷாலுக்கு மனமார்ந்த நன்றியை தெரிவித்துக்கொள்கிறது. அவர் திரையில் மற்றும் கதாநாயகன் அல்ல, நிஜ வாழ்விலும் சிறந்த கதாநாயகன்தான். இதுபோல் அவர் பணி மேலும் சிறக்க வாழ்த்துகிறோம்' என்று கூறியுள்ளனர்.