విజయ్ దేవరకొండ పేరుతో మోసం...
- IndiaGlitz, [Sunday,September 13 2020]
సినీ ఇండస్ట్రీని ఉపయోగించుకుంటూ పలువురు మోసాలకు పాల్పడుతున్న ఘటనలు ఇటీవల ఎన్నో వెలుగు చూశాయి. శేఖర్ కమ్ముల పేరుతో మోసం.. సింగర్ సునీత పేరుతో డబ్బుల వసూళ్లు.. ఇలా ఇటీవలి కాలంలో ఎన్నో ఘటనలు వెలుగు చూశాయి. తాజాగా సెన్సేషనల్ హీరో విజయ్ దేవరకొండ పేరుతో పలువురు మోసాలకు పాల్పడుతున్నారు. విజయ్ దేవరకొండతో సినిమా తీస్తున్నామని చెప్పి ఆడిషన్స్ నిర్వహిస్తున్నారు. ఈ విషయం విజయదేవరకొండ దృష్టికి వెళ్లడంతో ఆయన టీం ప్రతినిధి అనురాగ్ పర్వతనేని ఓ ప్రకటనను విడుదల చేశారు.
‘‘విజయ్ దేవరకొండ తో సినిమా తీస్తున్నామని ఆడిషన్స్ నిర్వహిస్తున్న వారిపై చర్యలు తీసుకుంటాం. విజయ్ దేవరకొండతో కలిసి సినిమా తీస్తున్నట్లు కొన్ని నిర్మాణ సంస్థలు తప్పుగా ప్రకటనలు ఇస్తూ నటి నటులకు ఆడిషన్స్ నిర్వహిస్తున్నట్టు మా దృష్టి కి వచ్చింది. విజయ్ దేవరకొండతో సంబంధం ఉన్న ఏ ప్రాజెక్ట్ అయినా అధికారికంగా విజయ్ మరియు అతని నిర్మాతలు ప్రకటిస్తారు. విజయ్ పేరు చెప్పి మోసగిస్తున్న నేరస్తులపై మేము చర్యలు చేపట్టాము. ఇలాంటి మోసగాళ్ళ పట్ల అందరూ అప్రమత్తంగా ఉండాలి. మీకు వచ్చే సమాచారాన్ని రెండుసార్లు తనిఖీ చేయాలని మేము అభ్యర్థిస్తున్నాము’’ అని అనురాగ్ పర్వతనేని ప్రకటనలో పేర్కొన్నారు.