నానితో 'ఛలో' భామ?
- IndiaGlitz, [Sunday,March 18 2018]
కింగ్ నాగార్జున, నేచుర‌ల్ స్టార్‌ నాని కథానాయకులుగా ఓ మల్టీస్టారర్ మూవీ తెరకెక్కుతున్న విషయం తెలిసిందే. ప్రముఖ నిర్మాత అశ్వినీ దత్ ఈ చిత్రాన్ని నిర్మిస్తుండగా.. శ్రీరామ్ ఆదిత్య దర్శకత్వం వహిస్తున్నారు. పూర్తి వినోదభరితంగా తెరకెక్కబోతున్న ఈ చిత్రంలో నాగ్ డాన్ పాత్రలో నటిస్తుండగా.. నాని డాక్టర్ పాత్రలో కనిపించనున్నారు. మణిశర్మ స్వరాలను సమకూరుస్తున్న ఈ చిత్రానికి.. పాటల రికార్డింగ్ కార్యక్రమాలను కూడా ప్రారంభించారు.
ఇదిలా ఉంటే.. ఈ సినిమాలో నాగ్, నానిల సరసన నటించే నాయికలుగా శ్రద్ధా శ్రీనాథ్, లావ‌ణ్య త్రిపాఠి పేర్లతో పాటు అనుష్క పేరు కూడా వినపడింది. తాజాగా ‘ఛలో’ భామ రష్మిక మంద‌న్నా పేరు కూడా వినిపిస్తోంది. ఈ సినిమా కథ ఆమెకు బాగా నచ్చిందని.. నాని సరసన నటించడానికి ఓకే చెప్పినట్టుగా కథనాలు వినిపిస్తున్నాయి. అయితే ఈ వార్తలపై దర్శకనిర్మాతలు ఏ విధంగా స్పందిస్తారో చూడాలి. ఇదిలా ఉంటే.. ప్ర‌స్తుతం ‘కృష్ణార్జున యుద్ధం’ చిత్రంతో నాని, ‘ఆఫీసర్’ సినిమాతో నాగార్జున బిజీగా ఉన్నారు.