"పవన్ కళ్యాణ్ గారు నా ఆడియో ఫంక్షన్ కి వచ్చారు కాబట్టే నా 'ఇష్క్' సినిమా పెద్ద హిట్ అయ్యింది" అని చెప్పుకునే నితిన్‌కు... ఇప్పుడు అదే పవన్ కళ్యాణ్ నిర్మాణంలో సినిమా చేసే అవ‌కాశం ద‌క్కింది. ఆ చిత్ర‌మే 'ఛ‌ల్ మోహ‌న్ రంగ‌'. ఈ చిత్రాన్ని ప‌వ‌న్‌తో పాటు నితిన్ తండ్రి కూడా క‌లిసి నిర్మించ‌డం విశేషం. అంతేగాకుండా, ఏస్ డైరెక్టర్ త్రివిక్రమ్ శ్రీనివాస్ ఈ సినిమాకి కథను అందించారు.

నితిన్ మాటలను బట్టి చూస్తే.. ఆడియో ఫంక్షన్‌కు పవన్ కళ్యాణ్ వస్తేనే సినిమా పెద్ద హిట్ అయితే, ఇక నిర్మిస్తే అది ఇంకెంత హిట్ అవుతుందోనని.. ఇటు నితిన్ అభిమానులతో పాటు, అటు పవన్ అభిమానులు కూడా ఆస‌క్తిగా ఎదురుచూస్తున్నారు. అదీగాక.. ఇది నితిన్ కెరీర్‌లో సిల్వర్ జూబ్లీ ఫిలిం (25వ సినిమా) కావడం విశేషం.

అలాగే.. 'భాగమతి', 'తొలిప్రేమ' సినిమాలతో సంగీతంపరంగా ఆకట్టుకున్న తమన్ ఈ సినిమాకి కూడా సంగీతం అందించడం ప్లస్ అనే చెప్పాలి. ఈ చిత్రానికి సంబంధించిన మొదటి పాటను ఈ వారంలో విడుదల చేయనుంది చిత్ర బృందం. 'లై' ఫేమ్ మేఘా ఆకాష్ కథానాయికగా నటించిన ఈ చిత్రాన్ని 'రౌడీ ఫెలో' ఫేమ్‌ కృష్ణ చైతన్య తెరకెక్కించారు.వీరాభిమాని సినిమాని అభిమాన నటుడు తెరకెక్కిస్తే ఎలా ఉంటుందో చూడాలంటే ఏప్రిల్ 5 వరకు వేచి ఉండాల్సిందే.