உலக நாயகன் கமல்ஹாசன் நேற்று தனது ரசிகர்களை சந்தித்தபோது, 'நான் அரசியல் கட்சி தொடங்கி அரசியலுக்கு வருவது உறுதி என்றும் இனியும் என்னை பார்த்து அரசியலுக்கு எப்போது வருவீர்கள் என்று கேட்க வேண்டாம்' என்றும் கூறினார். எனவே அரசியலுக்கு கமல் வருவது குறித்த அதிகாரபூர்வ அறிவிப்பு மட்டுமே வெளியாகவுள்ளது. அதேபோல் ரஜினியும் மிக விரைவில் தனது அரசியல் முடிவை அறிவிப்பார் என்றும் அவரது ரசிகர்கள் நம்பிக்கை வைத்துள்ளனர்.

இந்த நிலையில் ஊடகம் ஒன்றுக்கு பேட்டியளித்த கமல்ஹாசனின் சகோதரர் சாருஹாசன், 'ரஜினியும் கமலும் அரசியலுக்கு வரமாட்டார்கள் என்றும் ரஜினி வரமாட்டார், கமலை வரவிட மாட்டார்கள் என்பது என் கணிப்பு என்றும் கூறியுள்ளார். மேலும் ரஜினியும் கமலுமும் இணைந்து அரசியல் செய்தால் கூட 10 சதவிகிததுக்கு மேலாக ஓட்டு கிடைக்காது என்றும் ரஜினி நல்ல மனிதர் என்றாலும்  மக்கள் பிரச்சனைகளில் கமல் அளவுக்கு கூட ரஜினி ஆலோசனை நடத்தவில்லை என்றும் கூறினார்.

மேலும் கமல் எண்ணூர் கொசஸ்தலை ஆற்றை பார்வையிட்டது குறித்து கருத்து கூறிய சாருஹாசன், 'கமல் கொசஸ்தலை ஆற்றை பார்வையிட்டது செய்தியாக வரும். அன்புமணி பார்வையிட்டது செயல்பாடாக மாறும். நடிகர்கள் நாட்டுக்கு நல்லது செய்ய வேண்டும் என்ற எண்ணத்தோடு நடிக்க வருவதில்லை. தனக்கு ஒரு புகழை சம்பாதிக்கவே நடிக்க வருகிறார்கள். அரசியலுக்கு வர சினிமாவை பயன்படுத்திக்கொள்கிறார்கள்' என்று கூறினார்.