కరోనా నేపథ్యంలో సినిమా షూటింగ్స్, రిలీజ్‌లు, థియేటర్స్ మూసివేయడంతో ఇండస్ట్రీకి ఏ రేంజ్‌లో నష్టం వాటిల్లిందో ప్రత్యేకించి చెప్పనక్కర్లేదు. షూటింగ్స్ త్వరలోనే ప్రారంభించుకోవచ్చు ఇప్పటికే దాదాపు అన్ని రాష్ట్రాలు గ్రీన్ సిగ్నల్ ఇచ్చాయి కానీ.. జూన్ నుంచి మళ్లీ లాక్ డౌన్ 5.0 విధించడంతో మళ్లీ సీన్ మొదటికొచ్చింది. అయితే తాజాగా ఈ వ్యవహారంపై.. మరీ ముఖ్యంగా లాక్‌డౌన్ కారణంగా దాదాపు 70 రోజులుగా మూతబడిన సినిమా హాళ్లను తిరిగి తెరిచే విషయంలో కేంద్రం కీలక నిర్ణయమే తీసుకుంది. కేంద్ర సమాచార ప్రసారశాఖ మంత్రి ప్రకాశ్ జవదేకర్ మాట్లాడుతూ.. దేశవ్యాప్తంగా సినిమా హాళ్లను తెరిచే విషయమై జూన్ తర్వాత మాత్రమే ఆలోచిస్తామన్నారు. ఈ నెలలో కోవిడ్ కేసుల సంఖ్యను, పరిస్థితిని సమీక్షించిన అనంతరం ఈ విషయంలో ఓ నిర్ణయం తీసుకుంటామని కేంద్ర మంత్రి స్పష్టం చేశారు.

జూన్ తర్వాతే నిర్ణయం..

కాగా బుధవారం రాత్రి సినిమా రంగంలోని వివిధ సంఘాల ప్రతినిధులతో వీడియో కాన్ఫరెన్స్ ద్వారా జవదేకర్ సమావేశమయ్యారు. ఈ సందర్భంగా పరిస్థితులపై నిశితంగా చర్చించారు. సమావేశంలో భాగంగా చిత్ర పరిశ్రమ ఎదుర్కొంటున్న ఇబ్బందులను.. మరీ ముఖ్యంగా సినిమా థియేటర్లను తెరిపించేందుకు చర్యలు తీసుకోవాలని పలువురు సినీ పెద్దలు మంత్రి దృష్టికి తీసుకొచ్చారు. అనంతరం మీడియాతో మాట్లాడిన ఆయన.. ఒకింత శుభవార్తే చెప్పారు. ఈ నెల తర్వాత ఈ విషయంలో ఓ నిర్ణయం తీసుకుంటామని కేంద్ర మంత్రి తేల్చిచెప్పారు. దేశంలో ఉన్న 9,500 సినిమా హాళ్లలో కేవలం టికెట్ల అమ్మకంతోనే రోజుకు రూ. 30 కోట్లకు పైగా నష్టపోతున్నప్పటికీ లాక్‌డౌన్‌పై సినీరంగం సంఘీభావంగా ఉందని మంత్రి ప్రశంసించారు. రోజుకు 30 కోట్లకు పైగా ఆదాయం వస్తుందని.. ఆ మేరకు భారీగా సష్టపోయినప్పటికీ లాక్‌డౌన్‌ నిర్ణయంపై సినీరంగం సంఘీభావంగా ఉండటాన్ని ఆయన ప్రశంసించారు. సినీ సంఘాల ప్రతినిధులు తన దృష్టికి తీసుకొచ్చిన డిమాండ్లను పరిష్కరించేందుకు ప్రయత్నిస్తామని ఈ సందర్భంగా కేంద్ర మంత్రి హామీ ఇచ్చారు.

మొత్తానికి చూస్తే.. థియేటర్స్ తెరుచుకోడానికి మాత్రం కచ్చితంగా మరికొన్ని రోజులు అయితే సమయం పడుతుందన్న మాట. మరోవైపు రోజురోజుకూ దేశ వ్యాప్తంగా కరోనా కేసులు పెరిగిపోతున్నాయే తప్ప అస్సలు తగ్గట్లేదు. మరి దీన్ని బట్టి చూస్తే.. సినిమా థియేటర్లు ఏ మాత్రం తెరుచుకుంటాయో.. కేంద్ర, రాష్ట్ర ప్రభుత్వాలు ఏం చేస్తాయో వేచి చూడాల్సిందే.