ప్రముఖ చాక్లెట్‌ సంస్థ క్యాడ్‌బరీ ఇండియాకు సీబీఐ ఊహించని షాక్‌ ఇచ్చింది. తాజాగా క్యాడ్‌బరీ ఇండియా ప్రైవేట్‌ లిమిటెడ్‌పై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) కేసు నమోదు చేసింది. మోండలెజ్ ఫుడ్స్ ఫ్రైవేట్ లిమిటెడ్‌గా పిలవబడుతున్న ఈ సంస్థకు చెందిన 12 మందిపై కేసు నమోదైంది. ఇద్దరు సెంట్రల్ ఎక్సైజ్ అధికారులు నిర్మల్ సింగ్, జస్‌ ప్రీత్‌ కౌర్‌ సహా అప్పటి క్యాడ్‌బరీ ఇండియా వైస్ ప్రెసిడెంట్ (ఫైనాన్స్ అండ్ కంప్లైయన్స్) విక్రమ్ అరోరా, దాని డైరెక్టర్లు జైల్‌బాయ్ ఫిలిప్స్, రాజేష్ గార్గ్ సహా మొత్తం 12 మందిపై సీబీఐ కేసు నమోదు చేసింది. అవినీతి, మోసం ఆరోపణలతో సీబీఐ ఈ కేసును నమోదు చేసింది. సంస్థకు చెందిన హరియాణా, హిమాచల్‌ ప్రదేశ్‌లోని మొత్తం 10 ప్రదేశాలలో బుధవారం సీబీఐ దాడులు నిర్వహించింది. ఈ దాడుల్లో సంచలన విషయాలు వెలుగు చూశాయి.

క్యాడ్‌బరీ ఇండియా సంస్థపై సీబీఐ జరిపిన దర్యాప్తులో రికార్డులను తారుమారు చేయడం, వాస్తవాలను తప్పుగా చూపించడం వంటి విషయాలు వెలుగు చూశాయి. పన్ను ప్రయోజనాలను పొందేందుకు చేసిన ప్రయత్నంలో భాగంగా క్యాడ్‌బరీ సంస్థ ఈ మోసాలకు పాల్పడినట్టుగా వెల్లడైంది. ముఖ్యంగా హిమాచల్ ప్రదేశ్‌లోని బడ్డిలో ప్రాంత ఆధారిత పన్ను ప్రయోజనాలను పొందేందుకు వాస్తవాలను తప్పుగా చూపి అవినీతికి పాల్పడిందని ఎఫ్ఐఆర్‌లో సీబీఐ పేర్కొంది. 2009-11 మధ్య క్యాడ్‌బరీ కేంద్ర ఎక్సైజ్ అధికారులతో కుట్ర పన్నిందని సీబీఐ వెల్లడించింది. 5 స్టార్, జెమ్స్ చాక్లెట్‌ను తయారు చేస్తున్న హిమాచల్ ప్రదేశ్‌లో తన కొత్త యూనిట్ కోసం 241 కోట్ల రూపాయల పన్ను ప్రయోజనాలను పొందారని సీబీఐ ప్రధానంగా ఆరోపిస్తోంది. నిజానికి ఆదాయపు పన్ను మినహాయింపు పొందే అర్హత లేదని తెలిసినా కూడా సంస్థ మోసానికి పాల్పడిందని సీబీఐ వెల్లడించింది.

ఈ పన్ను మినహాయింపుల కోసం ఎగ్జిక్యూటివ్ బోర్డులోని కొందరు సభ్యులు, ముఖ్య నిర్వాహకులతో కలిసి కుట్ర పన్నిందని సీబీఐ పేర్కొంది. రికార్డులను మార్చాలని, మధ్యవర్తుల ద్వారా లంచాలు ఇవ్వడంతోపాటు ఆధారాలను కప్పిపుచ్చారనేది తమ అంతర్గత దర్యాప్తులో బయటపడిందని తెలిపింది. ఈ పన్ను ప్రయోజనాలను పొందేందుకు గాను.. అధికారులకు లంచాలు, తప్పుడు సమాచారం అందించిందని సీబీఐ వెల్లడించింది. ఆదాయ పన్ను మినహాయింపు పొందే అర్హత లేదని తెలిసినా మోసానికి పాల్పడిందని సీబీఐ ఆరోపిస్తోంది. దీనిపై మోండెలెజ్ ఇండియా ప్రతినిధి తాజాగా స్పందించారు. సీబీఐ నమోదు చేసిన కేసుకు సంబంధించి తమకు ఇంకా ఎటువంటి అధికారిక సమాచారమూ అందలేదని వెల్లడించారు. మొత్తానికి ఈ వ్యవహారం దేశ వ్యాప్తంగా హాట్ టాపిక్‌గా మారింది.