ప్రభాస్ ‘ఆదిపురుష్’కి షాక్.. వారిపై కేసు నమోదు
- IndiaGlitz, [Thursday,December 17 2020]
ప్రభాస్ ప్రధాన పాత్రలో భారీ బడ్జెట్ సినిమా ‘ఆదిపురుష్’ను ప్రకటించిన నాటి నుంచి వార్తల్లో నిలుస్తూనే ఉంది. తాజాగా ఈ సినిమా మరోసారి వార్తల్లో నిలిచింది. గతంలో అయితే దీని గురించిన అప్‌డేట్స్ ప్రేక్షకులను ఎంతో ఆనందపరిచేవి.. కానీ ఇప్పుడు మాత్రం మండిపడేలా చేస్తున్నాయి. దీనికి కారణం సినిమా గురించి ఇటీవల రావణాసురుడి పాత్రలో నటిస్తున్న సైఫ్ అలీ ఖాన్ చేసిన వ్యాఖ్యలు. ఆయన చేసిన వ్యాఖ్యలు వివాదాస్పదంగా మారాయి.
‘ఆదిపురుష్’ సినిమాలో రావణాసురుడి పాత్రకు అత్యంత ప్రాధాన్యముందని.. ఆ పాత్రను దయగల, మానవత్వంతో కూడిన వ్యక్తిగా చూపించబోతున్నట్టు సైఫ్ అలీఖాన్ తెలిపారు. అంతటితో ఆగక లక్ష్మణుడు.. తన సోదరి సూర్పనక ముక్కు కోసినందుకే సీతను రావణుడు అపహరించాడని... అందులో తప్పు లేదన్నట్టు మాట్లాడారు. ఈ మాటలు.. హిందువులకు ఆగ్రహావేశాలు తెప్పించాయి. సైఫ్ మాటలు హిందువుల మనోభావాలను కించపరిచేలా ఉన్నాయని కోర్టులో పిటిషన్ సైతం దాఖలైంది.
సనాతన ధర్మం గురించి సైఫ్ అలీఖాన్ చేసిన వ్యాఖ్యలు హిందువుల మనోభావాలను దెబ్బతీశాయని.. ఉత్తరప్రదేశ్‌ జౌన్‌పూర్ జిల్లాలోని అదనపు చీఫ్ జ్యుడీషియల్ మేజిస్ట్రేట్ కోర్టులో హిమాన్షు శ్రీవాస్త‌వ అనే న్యాయవాది పిటిషన్ దాఖలు చేశారు. సైఫ్‌తో పాటు దర్శకుడు ఓం రౌత్‌పై కూడా కేసు నమోదు చేశారు. దీంతో సైఫ్ దిగిరాక తప్పలేదు. వివాదాస్పద వ్యాఖ్యలు చేసినందుకుగాను.. సైఫ్ క్షమాపణలు చెప్పాల్సి వచ్చింది. ఇక ప్ర‌స్తుతం ఈ మూవీకి ప్రీ ప్రొడ‌క్ష‌న్ ప‌నులు జ‌రుగుతుండ‌గా.. వ‌చ్చే ఏడాది సెట్స్ మీద‌కు వెళ్ల‌నుంది. ఈ క్ర‌మంలో ఆదిపురుష్ కోసం ప్రభాస్ వ‌ర్కౌట్లు కూడా ప్రారంభించేశారు.