ప‌వ‌న్ క‌ళ్యాణ్ పేరుని జ‌పం చేస్తున్న‌ట్లుగా క‌ల‌వరించే సెలబ్రిటీల‌కి టాలీవుడ్‌లో కొద‌వే లేదు. ఈ లిస్ట్‌లోకి ఫ్రెష్‌గా చేరిన పేరు రాయ్ ల‌క్ష్మీది. ప‌దేళ్ల కింద‌టే ఈ గ్లామ‌ర్ డాళ్ తెలుగు సినీ వినీలాకాశంలోకి అడుగుపెట్టినా ప్రాప‌ర్‌గా స‌క్సెస్ అయితే అందిపుచ్చుకోలేక‌పోయింది. బాల‌కృష్ణ ప‌క్క‌న హీరోయిన్‌గా న‌టించిన అధినాయ‌కుడు చిత్రం కోసం భారీగా అందాల‌ను ప్ర‌ద‌ర్శించినా.. విజ‌య‌ల‌క్ష్మీ మాత్రం ఈ రాయ్ ల‌క్ష్మీని ప‌ల‌క‌రించ‌లేదు.

ఆ త‌రువాత ర‌వితేజ‌తో బ‌లుపు కోసం ఐటం గ‌ర్ల్‌గా మెరిసినా.. ఆ సినిమా హిట్ అయినా.. లక్ష్మీ కెరీర్‌కి ఒరిగిందేమీ లేదు. ఈ నేప‌థ్య‌లో త‌ల‌వ‌ని త‌లంపుగా ప‌వ‌న్ క‌ళ్యాణ్ స‌ర్ధార్ గ‌బ్బ‌ర్ సింగ్ కోసం ఆఫ‌ర్ రావ‌డంతో అమ్మ‌డి ఆనందానికి ఆకాశ‌మే హ‌ద్దు అయింది. తెలుగు నాట ఐరెన్‌లెగ్‌గా పేరు తెచ్చుకున్న శ్రుతి హాస‌న్‌, ప్ర‌ణీత లాంటి హీరోయిన్‌ల‌కు ప‌వ‌న్ ప‌క్క‌న న‌టించాకే తొలి విజ‌యం, అవ‌కాశాల వెల్లువ అనుభ‌వంలోకి వ‌చ్చిన వైనం త‌న‌కు వ‌ర్తిస్తుంద‌ని రాయ్ ల‌క్ష్మీ భావిస్తోంది. స‌ర్ధార్ గ‌బ్బ‌ర్‌సింగ్‌లో కాజ‌ల్ హీరోయిన్‌గా న‌టిస్తుండ‌గా.. రాయ్ లక్ష్మీ రెండు పాట‌లు, కొన్ని స‌న్నివేశాల‌లో సంద‌డి చేయ‌నుంద‌ని టి టౌన్ వ‌ర్గాలు పేర్కొంటున్నాయి.