టీడీపీకి బుట్టా రేణుక గుడ్‌బై చెప్పేస్తారా..!?
- IndiaGlitz, [Saturday,March 02 2019]
కర్నూలు ఎంపీ టికెట్‌‌పై క్లారిటీ ఇవ్వకపోవడంతో బుట్టారేణుక గత కొన్ని రోజులుగా తీవ్ర అసంతృప్తితో ఉన్నారు. అయితే కోట్ల ఫ్యామిలీ టీడీపీ తీర్థం పుచ్చుకోబోతున్నారన్న వార్త తెలిసినప్పట్నించి ఆ అసంతృప్తి రెట్టింపయ్యింది. ఇప్పటికే కర్నూలు టీడీపీ ఎంపీ అభ్యర్థి కోట్ల సూర్యప్రకాశ్ రెడ్డి పేరు దాదాపు ఖరారైందని వార్తలు వినవస్తున్నాయి.
దీంతో బుట్టాకు ఎమ్మెల్యే టికెట్ ఇస్తారని ఊహాగానాలు వస్తున్నాయి. అయితే తనకు ఎంపీ టికెట్టే కావాలని బుట్టా.. సీఎంను పట్టుబట్టారు. టీడీపీ అధిష్టానం నుంచి ఎలాంటి స్పందన రాకపోవడంతో ఆమె తీవ్ర ఆవేదన వ్యక్తం చేస్తున్నారు. అంతేకాదు ఆమె టీడీపీకి గుడ్ బై చెప్పేస్తారని కూడా పెద్ద ఎత్తున వార్తలు వినవస్తున్నాయి.
శనివారం రోజున కర్నూలు జిల్లాలోని కోడుమూరులో ఏపీ సీఎం చంద్రబాబు పర్యటించారు. ఈ సందర్భంగా కోట్ల కుటుంబం.. చంద్రబాబు సమక్షంలో పసుపు కండువా కప్పుకుంది. సొంత జిల్లాకు సీఎం చంద్రబాబు వచ్చినా.. ఇంత పెద్ద కార్యక్రమం జరుగుతున్నప్పటికీ బుట్టా రేణుక మాత్రం కిమ్ అనకుండా ఇంటికే పరిమితమయ్యారు. ఆమె గైర్హాజరవ్వడంతో ఏపీ రాజకీయాల్లో చర్చనీయాంశమయ్యారు.
టికెట్ పై ఎలాంటి స్పష్టత ఇవ్వకపోవడంతో రేణుక అసంతృప్తితో రగిలిపోతున్నారు. కర్నూలు ఎంపీగా వైసీపీ తరఫున గెలిచిన బుట్టా చంద్రబాబు సమక్షంలో టీడీపీ తీర్థం పుచ్చుకున్నారు. రానున్న ఎన్నికల్లో టీడీపీ తరఫున టికెట్ ఇస్తారని ఆమె ఆశించారు. అయితే పార్టీలోకి జిల్లా నుంచి కొత్త కొత్త చేరికలు ఉండటంతో బుట్టా టికెట్‌‌కు అడ్డంకులు వచ్చిపడ్డాయి.
అయితే ఆమె పార్టీ మారతారని పెద్ద ఎత్తున వార్తలు వస్తున్నాయి. ఒకవేళ పార్టీ మారాల్సి వస్తే బుట్టా ఏ పార్టీలో చేరతారు..? మళ్లీ వైసీపీకే గూటికే చేరతారా..? లేకుంటే ఇండిపెండెంట్‌గా బరిలోకి దిగుతారా అన్నది తెలియాల్సి ఉంది. మొత్తానికి చూస్తే రెండ్రోజుల్లో ఈ వ్యవహారంపై క్లారిటీ వచ్చే అవకాశాలు మెండుగా ఉన్నాయి.