பிப்ரவரி 4ஆம் தேதி டெல்லி செல்லும் புஸ்ஸி ஆனந்த்.. விஜய்யின் அடுத்த கட்ட திட்டம்..!
- IndiaGlitz, [Friday,January 26 2024]
விஜய் மக்கள் இயக்கத்தின் நிர்வாகிகள் பிப்ரவரி 4ஆம் தேதி டெல்லி செல்ல இருப்பதாக தகவல் வெளியே வந்துள்ளதை அடுத்து விஜய்யின் அடுத்த திட்டம் என்ன என்பது தற்போது தெரியவந்துள்ளது.
தளபதி விஜய் விரைவில் அரசியல் கட்சி தொடங்குவார் என்று எதிர்பார்க்கப்படும் நிலையில் நேற்று விஜய் மக்கள் இயக்கத்தின் நிர்வாகிகளுடன் ஆலோசனை செய்தார். இந்த ஆலோசனையின் போது விஜய் தொடங்க இருக்கும் கட்சியின் தலைவர், பொதுச்செயலாளர், பொருளாளர் உள்ளிட்ட பதவிக்கு நிர்வாகிகள் தேர்வு செய்யப்பட்டதாக கூறப்பட்டது.
விஜய் தான் கட்சியின் தலைவர் என்றும், அவர் தேர்தலில் போட்டியிடுவது, எந்தெந்த கட்சிகளுடன் கூட்டணி அமைப்பது போன்ற ஆலோசனை நடத்தவும், கூட்டணி குறித்து இறுதி முடிவு எடுக்கவும் விஜய்க்கு அனுமதி வழங்கப்பட்டுள்ளதாகவும் செய்திகள் வெளியானது.
இந்த நிலையில் வரும் பிப்ரவரி 4ஆம் தேதி விஜய் மக்கள் இயக்கத்தை சேர்ந்த புஸ்ஸி ஆனந்த் உட்பட சில நிர்வாகிகள் டெல்லி செல்ல இருப்பதாகவும் விஜய் மக்கள் இயக்கத்தை அரசியல் கட்சியாக டெல்லியில் உள்ள தேர்தல் ஆணையத்தில் பதிவு செய்ய இருப்பதாகவும் கூறப்படுகிறது.
இதனை அடுத்து விஜய்யின் அடுத்த கட்ட நகர்வு அரசியல் தான் என்பது உறுதி செய்யப்பட்டுள்ளது. தமிழ் திரை உலகில் இருந்து சிவாஜி கணேசன் முதல் விஜயகாந்த் வரை ஏராளமான நடிகர்கள் ஏற்கனவே சொந்த கட்சி ஆரம்பித்து அரசியலுக்கு வந்து குறிப்பிடத்தக்க வெற்றியை பெறாத நிலையில், விஜய் வெற்றி பெறுவாரா என்பதை பொறுத்திருந்து பார்ப்போம்.