ఉప్పెన‌తో సెన్సేష‌న్ క్రియేట్ చేసిన ద‌ర్శ‌కుడు బుచ్చిబాబు సానా, తొలి సినిమాతో బ్లాక్‌బ‌స్ట‌ర్ సొంతం చేసుకున్నాడు. దీంతో నిర్మాత‌లంద‌రూ బుచ్చిబాబుతో సినిమా చేయాల‌ని ఉవ్విలూరుతున్నారు. అడ్వాన్సుల‌తో సిద్ధంగా ఉన్నారు. అయితే బుచ్చిబాబు త‌న త‌దుప‌రి చిత్రాన్ని మాత్రం త‌న‌కు ద‌ర్శ‌కుడిగా బ్రేక్ ఇచ్చిన నిర్మాణ సంస్థ మైత్రీ మూవీ మేక‌ర్స్‌లోనే చేయ‌బోతున్నాడంటూ స‌మాచారం. ఆస‌క్తిక‌ర‌మైన విష‌య‌మేమంటే.. తొలి సినిమాను ల‌వ్‌స్టోరిగా చేసిన బుచ్చిబాబు.. అందుకు భిన్న‌మైన స్పోర్ట్స్ బ్యాక్‌డ్రాప్‌లో రెండో సినిమాగా చేయ‌డానికి ప్లాన్ చేస్తున్నాడ‌ట‌.

సినీ వ‌ర్గాల్లో వినిపిస్తోన్న స‌మాచారం మేర‌కు 1980 కాలంలో గోదావ‌రి జిల్లాలో నేప‌థ్యంలోనే బుచ్చిబాబు త‌న రెండో సినిమాను తెర‌కెక్కిస్తాడ‌ని వార్త‌లు వినిపిస్తున్నాయి. మైత్రీ మూవీ మేక‌ర్స్ ఓ స్టార్ హీరోతో ఈ సినిమాను తెర‌కెక్కించ‌డానికి చ‌ర్చ‌లు జ‌రుపుతున్నార‌ని టాక్‌. త్వ‌ర‌లోనే ఈ సినిమాకు సంబంధించి ఓ క్లారిటీ రానుంద‌ని ఇండ‌స్ట్రీ వ‌ర్గాలు అంటున్నాయి.