మాస్ డైరెక్ట‌ర్‌గా పేరు తెచ్చుకుని అగ్ర హీరోల‌తో యాక్ష‌న్ ఓరియెంటెడ్ సినిమాల‌ను తెర‌కెక్కించిన దర్శ‌కుడు బోయ‌పాటి శ్రీను. ఈ ద‌ర్శ‌కుడు ప్ర‌స్తుతం బాల‌కృష్ణతో హ్యాట్రిక్ మూవీని తెర‌కెక్కించ‌నున్న సంగ‌తి తెలిసిందే. సింహా, లెజెండ్ చిత్రాల త‌ర్వాత వీరిద్ద‌రి కాంబినేష‌న్‌లో రాబోతున్న చిత్రం కావ‌డంతో సినిమాపై భారీ అంచ‌నాలే నెల‌కొన్నాయి. భారీ బ‌డ్జెట్‌తో సినిమాల‌ను తెర‌కెక్కించ‌డానికే బోయ‌పాటి ఆస‌క్తి చూపుతుంటాడు.

ఆ విష‌యంలో త‌ను కాంప్ర‌మైజ్ కాడు. కాబ‌ట్టి సినిమా మేకింగ్ విష‌యంలో నిర్మాత‌కు మ‌రీ భారం కాకుండా ఉండాల‌ని త‌న రెమ్యున‌రేష‌న్‌ని స‌గానికి త‌గ్గించుకున్నాడ‌ట‌. అంటే రూ.15 కోట్ల వ‌ర‌కు ఉండే బోయపాటి రెమ్యున‌రేష‌న్ త‌న తాజా చిత్రానికి మాత్రం రూ.8కోట్ల‌ను మాత్ర‌మే తీసుకుంటున్నాడ‌ట‌. ఈ సినిమాలో బాలీవుడ్ స్టార్ సంజ‌య్ ద‌త్‌ను విల‌న్‌గా న‌టింప చేస్తుండటంతో పాటు భారీ తారాగ‌ణాన్ని తీసుకోవాల‌ని బోయ‌పాటి యోచిస్తున్నాడ‌ట‌.

నిజానికి విన‌యవిధేయ‌రామ సినిమాకు ముందు వ‌ర‌కు బోయ‌పాటి రూ.15 కోట్ల రెమ్యున‌రేష‌న్ తీసుకున్నాడ‌ట‌. అయితే ఆ చిత్రం డిజాస్ట‌ర్ కావ‌డంతో బోయపాటి త‌న త‌దుప‌రి సినిమాను ట్రాక్ ఎక్కించ‌డానికి స‌మ‌యం ప‌ట్టింది. మేకింగ్ విష‌యంలో బోయ‌పాటి ఈసారికి అలా కానిచ్చేస్తున్నాడు. మ‌రి బోయ‌పాటి స్వంత నిర్ణయం నిర్మాత‌కు ఏ మేర లాభాన్ని తీసుకొస్తుందో చూడాలి.